Semináriu nasionál anuál SEKoop, iha salaun São José Catedral, Vila-verde, tersa (30/12). Imajen/Mídia SEKoop

DILI, 29 dezembru 2020 (TATOLI)--Sektretáriu Estadu Kooperativa, Elizário Ferreira, hateten bainhira grupu kooperativa ida atu la’o di’ak hodi kontribui ba ekonomia nasionál, presiza formasaun no informasaun ba membru sira.

“Presiza tebes ita injeta edukasaun ba grupu kooperativa sira  hodi bele sobrevive, tanba  bainhira ita la esforsu sira ho edukasaun liuhosi formasaun no informasaun, maka sira sei la ba oin, tanba ne’e mak iha tinan 2021 edukasaun sai prioridade ba kooperativa atu sira bele buras ba beibeik hodi kontribui ba ita-nia ekonomia nasionál,” Sekretáriu Estadu Elizário dehan, tersa ne’e, iha salaun São José Catedral, Vila-verde, Dili.

Ho hanoin hirak ne’e maka Sekretaria Estadu Kooperativa (SEKoop) ho inisiativa realiza semináriu nasionál anuál ho tema ‘rekursu umanu ba fortalesimentu institusionál hodi implementa programa polítiku SEKoop’, ho objetivu prinsipál atu hetan opiniaun di’ak no bele konklui planu estratéjiku ba dezenvolvimentu kooperativa nian iha 2020-2022 inklui halo previzaun ba 2030.

“Objetivu seluk  maka oinsá asegura kooperasaun di’ak entre funsionáriu sira atu hala’o serbisu hodi asegura relasaun di’ak ba família, komunidade, sosiedade no mós kooperativa sira atu nune’e bele kontribui ba dezenvolvimentu ekonomia nasionál no implementa programa SEKoop ne’ebé maka iha ona planu nia-laran bele tuir duni programa no ezekusaun tuir tempu ne’ebé define ona,” nia akresenta.

Aleinde ne’e, tinan oin SEkoop iha programa polítiku lima ne’ebé hakarak fortalese funsionamentu instituisaun hanesan serví povu ho di’ak  liuhosi kriasaun kooperativa, edukasaun liuhosi formasaun no informasaun.

Nune’e mós, reforsa kapitál finanseira kréditu atu nune’e fasilita kréditu ba grupu produtivu mikro no empreza kiik sira hanaran ekonomia informál sira atu hakbiit kapitál hodi investe iha área produtivu hodi kontribui ba rekuperasaun ekonomia nasaun.

Organiza joven filafali ba kampu atu eduka sira liuhosi formasaun motiva no insentiva atu nune’e bainhira sira fila ba kampu bele eduka fali inan aman sira serbisu iha vida kooperativa hodi partisipa iha ekonomia nasionál.

“Ikus liu maka atu kria kondisaun merkadu ba ita-nia produtór sira, tanba agora povu kuda Governu sosa ona povu-nia produtu, signifika ba oin povu sei motivadu di’ak liután atu kuda, tanba ne’e la’ós ona kompeténsia Governu atu sosa beibeik maibé Goverun kria kondisaun oinsá atu lori povu hetan merkadu ne’ebé sustentável no kualidade,” nia subliña. 

Governante ne’e informa, daudaun ne’e SEKoop loke ona grupu kooperativa iha postu administrativu 37.

“Sira ne’ebé iha ona, tinan oin hadi’a di’ak liután atubele asegura sira-nia sustentabilidade finanseira no ekonómika, maibé  ba sira ne’ebé seidauk iha ita sei estabelese,” nia hatutan.

Iha semináriu ne’e, konvida mós oradór espesiál hanesan Líder Nasionál Marí Alkatiri ne’ebé lori matéria kona-ba ‘importánsia kooperativa ba dezenvolvimentu nasionál.’

Iha ninia intervensaun, enkoraja funionáriu SEKoop tomak atu serbisu maka’as liután hodi mobiliza sosiadade sira envolve-an iha kooperativa.

“Ita bo’ot funsionáriu SEKoop tenki tun ba baze hodi mobiliza sosiadade sira oinsá bele komprende no hola parte iha kooperativa hodi nune’e bele eleva ekonomia sosiál rai-laran,” hateten eis Primeiru-Ministru ne’e.

Iha sorin seluk, iha ámbitu ne’e, Komisáriu Funsaun Públika, Antonio Freitas, lori matéria ‘hakbiit rekursu umanu ba fortalesementu hodi implementa programa polítika SEKoop ba 2021.’

“Nu’udar mákina Estadu tenki kumpre regra sira ne’ebé maka estabele ona no mós parte rekusu umanu  tenke koopera ho parte hotu nune’e bele kria planu no programa ne’ebé efetivu,” nia fó hanoin.

Bazeia ba dekretu lei númeru 16/2004, iha tipu kooperativa 13 ne’ebé presiza estabelese iha Timor-Leste, maibé daudaun foin iha neen.

Ramu kooperativa ne’ebé iha hanesan kréditu uniaun ho totál 96 ho nia totál kapitál $6.125.496,56 husi membru hamutuk 12.679, kooperativa haat hetan apoia orsamentu husi subvensaun públika, enkuantu kooperativa seluk maioria halibur osan husi komunidade sira.

Multi sektorál hamutuk 52 ho totál kapitál $515.413,57 husi membru hamutuk 1.642, agrikultura iha 19 ho membru 368, ho totál kapitál $52.213, peska iha 15 ho membru 369, ho totál kapitál $24.122.

Nune’e mós, pekuária iha 3 ho membru 185, ho totál kapitál $982 no indústria iha neen, ho kapitál $17.899, ne’ebé halibur membru hamutuk 83.

Jornalista: Natalino Costa

Editora: Julia Chatarina

 

HAKEREK NO HATÁN

Please enter your comment!
Please enter your name here