Komandante Jerál PNTL, Komisáriu Faustino da Costa no Segundu Komandante Jerál PNTL, Komisáriu Mateus Fernandes, hamutuk ho ofisiál superiór PNTL atualiza situasaun jerál iha Timor-Leste. Imajen Tatoli/Eugénio Pereira

DILI, 29 dezembru 2020 (TATOLI)- Durante tinan tomak ida, hosi janeiru to’o dezembru 2020, Komandu Jerál Polísia Nasionál Timor-Leste (PNTL) demite nia membru ho atitude “vandalizmu” na’in-sia (9).

Membru PNTL na’in-sia ne’e komete irregularidade no kontra regulamentu disiplinár. Mezmu nune’e, Komandante Jerál Polísia Nasionál Timor-Leste (PNTL), Komisáriu Faustino da Costa, liuhosi konferénsia imprensa iha Komandu Jerál, PNTL Caicoli, Dili, ohin, la fó informasaun detallu kona-ba identidade membru na’in-sia ne’ebé Komandu PNTL demite.

Durante tinan tomak ne’e, Komandu PNTL loke prosesu disiplinár ba membru hamutuk na’in-181, maibé na’in-sia konsidera violasaun grave ba regulamentu interna PNTL nian no komandu la bele ona tolera hodi hasai sira hosi instituisaun ne’ebé tane lema “Mantein Lei no Orden”.

“Iha tinan 2020 ne’e Komandu PNTL loke prosesu membru polísia nia kazu ne’ebé rejistu hamutuk 181, no komandu halo demisaun ba membru na’in-sia (9),” Komandante Jerál PNTL, Komisáriu Faustino da Costa, informa.

Mebmru PNTL na’in-sia (9) hetán demisaun ne’e kompostu hosi membru na’in-neen (6) ninia kazu envolve iha 2017, 2018, 2019 no membru na’in tolu (3) envolve kazu iha tinan 2020. 

Atu evita kazu ne’e ba oin, Komandante Jerál PNTL husu nafatin ba ofisiál superiór no membru polísia hotu iha Timor-Leste atu sai nafatin ezemplu hodi implementa lei no orden tuir Konstituisaun Artigu 147 ne’ebé ko’alia kona-ba misaun no vizaun PNTL nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here