Portavós Komandu Jerál PNTL, Superintendente Xefe, Arnaldo de Araújo. Imajen Tatoli/Eugénio Pereira

DILI, 24 dezembru 2020 (TATOLI)- Komandante Jerál Polísia Nasionál Timor-Leste (PNTL) hasai alerta dala ida tan no dala ikus, hodi husu ba labarik no juventude sira atu la bele sunu fogete durante misa Natál, orasida-kalan.

Notísia Relevante : Igreja ho Polisia “Bandu” Sarani Tiru Fogete iha Misa Laran

Komandu PNTL liu hosi Unidade Polísia Marítima (UPM) mós fó hanoin ba família hotu-hotu iha territóriu nasionál, atu kuidadu ba hariis tasi durante selebra festa Natál tanba durante fulan dezembru, tinan ne’e, iha tendénsia akontese udan ho intensidade fraku to’o forte iha territóriu Timor-Leste.

Portavós PNTL, Superintendente Xefe, Arnaldo de Araújo, deklara sira-nia parte koopera ona ho parte Igreja hodi halo vijilánsia no kontrola sarani sira ba misa labele lori fogete tama Igreja laran.

“PNTL halo seguransa maka’as iha Igreja atu sarani bele livre ba misa, orasida kalan to’o aban dadeer 25 dezembru,” Arnaldo de Araújo, informa ba jornalista sira, ohin, iha Komandu Jerál PNTL, Caicoli, Dili.

PNTL husu ba família sira hotu atu akompaña sira-nia oan misa tenke disiplina hodi partisipa misa ho di’ak no hakmatek.

Komandu PNTL mós fó sai alerta dala ikus tan atu juventude sira la bele hemu tua no dansa iha prezépiu.

PNTL Dili koopera Polísia Militár (PM), FALINTIL-Forsa Defeza Timor-Leste, Unidade Polísia Marítima, Unidade Polísia Espesiál (UEP) halo operasaun konjunta hodi asegura situasaun seguransa iha Dili no territóriu Timor-Leste.

Kuidadu, ba hariis tasi

Ekipa Crusvermeila halao hela evakuasaun ba vitima sira iha Tasi ibun Bidau Santana bainhira hala’o simulasaun hodi komemora loron Mundial Redusaun Risku Desastre, Tersa 13 Otubru 2020. Imajen Tatoli/Dok.

Komandu Unidade Polísia Marítima (UPM) alerta ba abitante sira hotu iha territóriu nasionál  atu kuidadu lori oan sira ba hariis tasi, tanba daudaun ne’e parte Diresaun Nasionál Meteorolojia fó sai previzaun tempu durante dezembru ne’e tendénsia akontese udan ho intensidade fraku to’o forte iha territóriu Timor-Leste.

Tuir previzaun DNMG (Direção Nacional Meteorologia e Geofisica) katak iha loron 24 dezembru 2020, observa udan sei kontinua akontese hosi períodu dadeer to’o loraik ho intensidade fraku to’o moderadu iha territóriu Timor-Leste laran tomak, exeptu ba Munisípiu Viqueque no Manatuto (Setór Súl) maka iha tendénsia atu akontese udan ho intensidade moderadu to’o forte,  liuliu ba munisípiu sira hanesan Manatuto (Soibada, Tuquetin, Laclubar, Laleia parte sul), Viqueque (Ossu, Dilor), Baucau (Venilale, Baguia), Lautem (Luro, Lospalos), Manufahi, Covalima  no Bobonaro (Maliana, Lolotoe).

Ba loron 25 dezembru 2020, hosi modelu sira hatudu katak iha tendénsia atu akontese udan ho intensidade ne’ebé variavel depende ba rejiaun:

  1. Ba rejiaun Norte (Dili, Liquiça, Manatuto, Baucau, Lautem) iha tendensia atu akontese udan ho intensidade fraku to’o moderadu.
  2. Ba Setór Sentrál no Súl hosi Illa Timor, iha posibilidade atu akontese udan ho intensidade moderadu to’o forte, no iha risku ba inundasaun no erozaun iha munisípiu sira ne’ebé tama kategoria risku ba dezastre.

Avizu ka alerta ne’ebé fó sai hosi  DNMG  iha sira-nia pájina ofisial iha Facebook katak, eventuál ida-ne’e akontese tanba hetan influensia hosi sistema meteorolójiku sira  hanesan: Brisa Marítima, La-Nina, monsaun Asia-Austrália no Efeitu dinámiku no termodinámika hosi atmosfera nian.

Ho situasaun klimátika ne’e, DNMG husu ba viajante sira ne’ebé maka sei halo viajen hodi vizita família iha munisípiu atu kontinua atentu ba eventuál udan ho intensidade moderadu to’o forte no kontinua hadook aan hosi fatin risku sira hanesan mota, ai-huun boot, inundasaun no seluk tan.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here