Gabinete Apoiu Atividade Konjúje Prezidente Repúblika (GAAC-PR, sigla portugés) hamutuk ho espoza ofisiál Polísia Nasionál Timor-Leste (PNTL) no espoza ofisiál Falintil-Forsa Defeza Timor-Leste (F-FDTL) hala’o vizita hodi haree labarik moras sira iha HNGV. Imajen Tatoli/Osória Marques.

DILI, 23 dezembru 2020 (TATOLI)—Gabinete Apoiu Atividade Konjúje Prezidente Repúblika (GAAC-PR, sigla portugés) hamutuk ho espoza ofisiál Polísia Nasionál Timor-Leste (PNTL) no espoza ofisiál Falintil-Forsa Defeza Timor-Leste (F-FDTL) hala’o vizita hodi haree labarik moras sira iha sala pediatria iha Hospitál Nasionál Guido Valadares (HNGV-sigla portugés), ohin.

“Ohin, ita hamutuk ho espoza ofisiál PNTL-FFDTL vizita moras iha sala pediatria nian hodi ita fó solidaridade no korajén ba inan-aman,” espoza PR Cidália Nobre Lopes Mouzinho Guterres hatete ba jornalista sira, hafoin vizita labarik moras sira iha sala pediatria Hospitál Nasionál Guido Valadares (HNGV-sigla portugés), ohin.

Iha vizita ida-ne’e, Espoza PR kontinua dejeiza no fó korajén nafatin ba moras no família sira atu rekupera hikas hosi moras.

“Ita nafatin fó korajén no dejeizu ba sira atu bele saúde di’ak hodi ita selebra loron natal no tinan foun ne’e ho haksolok hamutuk,” Espoza PR hatetetn.

Kona-ba kondisaun labarik balun ne’ebé grave, inan ba nasaun Timor-Leste ne’e haktuir katak nia triste bainhira haree kondisaun labarik moras sira.

“Ita triste ho pasiente ki’ik-oan sira maibé ida-ne’e mak ita haree kondisaun daudaun iha ospitál ne’e. Maibé kona-ba sira-nia moras, doutór sira hatete kontinua fó atendementu di’ak ba sira. Balun ne’ebé fou-foun mai ho grave tebes, maibé bainhira muda ba sala pediatria iha evulusaun boot tebes ba sira-nia moras,” Cidália Nobre Lopes Mouzinho Guterres haktuir.

Inan ba nasaun ne’e afirma tan, ho evulusaun boot ne’e, inan-aman balun kontente hodi hasai matan-been tanba ho doutór sira-nia esforsu no atendementu ne’ebé di’ak, nune’e labarik balun di’ak fila-fali.

“Ha’u hanoin ida-ne’e mak realidade ne’ebé mak ita-nia doutór sira atende iha sala pediatria ninian”, nia dehan.

Nia dehan, apoiu sasan ba pasiente sira ne’e kolabora hamutuk espoza ofisiál PNTL-F-FDTL ne’ebé maihosi Jonhson Tasmania iha tinan kotuk hamutuk ho boneka, brikeidus inklui ho kadernu lapizeira no materiál eskola nian.

“Iha balun ha’u fó tiha ona iha PR nia vizita no Lospalos mós ami fahe tiha ona. Maibé ami mós hanoin tinan oin sei fahe tan eskola sira ne’ebé mak presiza duni, liliu ba eskola pre-primária ka infantil sira,” nia akresenta.

Aleinde apoiu hosi espoza PR, nia dehan, Palásiu Prezidénsia Nicolau Lobato mós fahe sasán balun ba pasiente inklui oferese karau ida ba HNGV hodi han hamutuk iha loron natal ida-ne’e.

Espoza Prezidente Repúblika, Cidália Nobre Lopes Mouzinho Guterres, hateten tinan-tinan gabinete espoza sempre halo vizita ba labarik moras sira. No foin lalais ne’e gabinete akompañia ho Prezidente Repúblika halo vizita no natal hamutuk ho labarik sira iha uma mahon no mós labarik defisiénsia sira iha Baucau.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here