Seremónia pose estrutura Kooperativa Paulo de Jesus, iha munisípiu Liquiçá, tersa (22/12). Imajen/Natalino Costa

LIQUIÇÁ, 22 dezembru 2020 (TATOLI)—Sekretáriu Estadu Kooperativa, Elizário Ferreira, partisipa no fó pose ba estrutura Kooperativa Kréditu Uniaun Paulo de Jesus, atu asegura unidade iha kooperativa nia laran.

“Jere koperativa ho espíritu no prinsípiu kooperativa hodi asegura sustentabilidade kooperativa, asegura estabilidade finanseiru no asegura estabilidade ekonómika iha vida família no sosiedade,” Sekretáriu Estadu Elizário apela ba estrutura no membru kooperativa Paulo de Jesus, tersa ne’e, iha seremónia pose, iha munisípiu Liquiçá.

Kooperativa ne’e harii husi inisiativa família atuál Ministru Defeza, Filomeno de Jesus Paixão, ho estrutura hamutuk 20, kompostu husi feto 10 no mane 10, ne’ebé mai husi jerasaun uma-lisan Besilau Bolelo iha munisípiu Liquiçá.

Hanesan Konselleiru ba kooperativa kréditu ne’e, Filomeno Paixão husu ba membru atu abranje kooperativa la’ós haree ba família de’it.

“Kooperativa ne’e oinsá maka ema hotu iha vontade hala’o serbisu, tanba kooperativa hanesan sistema ne’ebé kria ba ema seluk nia susar, ne’ebé bele lori sosiedade sai jeneroza no komprensiva liu atu hanoin malu liuhosi sentimentu amor karidade kooperasaun entre membru sira,” nia subliña.

Biban ne’e, Filomeno apela ba fundadór kooperativa hodi kaer nafatin promesa no kompromisu dezenvolve kooperativa ne’e.

“Labele halimar ho juramentu no kompromisu, tenke lori ida-ne’e ba oin atu ita bele muda ema-nia vida,” nia akresenta.

Iha fatin hanesan, Prezidente kooperativa, Paulo de Jesus, hateten objetivu harii kooperativa ne’e hodi tulun membru sira.

“Kuandu kooperativa ne’e boot maka ami sei nakloke ba komunidade tomak atu sai membru,” nia tenik.

Kooperativa ne’e daudaun ho membru 30-resin, ho ninia osan harii kooperativa hamutuk $4.000.

“Sai membru kooperativa ida-ne’e ho osan $120,” nia informa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here