Konferénsia imprensa LFTL. Imajen Tatoli/Hortencio Sanchez

DILI, 22 dezembru 2020 (TATOLI) – Órgaun Liga Futeból Timor-Leste (LFTL) deside ona kalendáriu  ba jogu Liga Timorense époka 2021 no janela transferénsia primeira parte sei hahú hosi loron 01 to’o loron 31 janeiru 2021 ba klube sira hodi fa’an no sosa jogadór.

Janela transferénsia ba jogadór faze segundu sei hahú iha loron 31 maiu to’o loron 15 juñu 2021, hafoin hakat ba segunda jornada primeira divizaun nian.

“LFTL mós sei loke transferénsia internasionál ba jogadór internasionál sira ne’ebé hakarak mai joga iha ita nia liga hamutuk ho klube sira sei hahú hosi loron 28 dezembru 2020 to’o loron 28 fevreiru 2021,” diretór relasaun públiku LFTL,  Diogo Neto Fraga, informa  liuhosi konferénsia imprensa, ohin loraik, iha Estádiu Munisipál Dili.

Tuir dokumentu ba oráriu ne’ebé Agência Tatoli asesu hosi LFTL total jogu hosi primeiru divizaun nian hamutuk 90 jogu hosi jornada 18 primeira volta no segunda volta.

Iha dokumentu ofisial LFTL nian mós deskreve katak oráriu ba jogu Tasa 12 Novembru ho sistema vota for a ka lakon sai sei hala’o bainhira jogu liga remata total.

 Daudaun ne’e primeira divizaun provizóriu klube ualu (8) mak hanesan, AD. SLB Laulara, Aitana FC, Karketu Dili FC, Boavista Clube de Timor, Lalenok United FC, AS Ponta Leste, Assalam FC no DIT FC.

Iha époka ne’e LFTL planeia ona atu aumenta tan primeira divizaun ba klube 10 tuir rezolusaun ne’ebé aprova iha kongresu no konferénsia nasionál LFTL nian foin lalais, ho nune’e fó oportunidade ba klube sira iha segunda divizaun hodi halo jogu Play of nune’e foin hatene loos klube rua ne’ebé hetan pontu boot sei  promove ba primeira divizaun.

“Iha rezultadu kongresu no konferénsia ne’ebé LFTL halo hamosu rezolusaun ida katak klube ne’ebé atu kompete iha primeira divizaun tenke klube 10 no mós iha segunda divizaun mós tenke 10. Haree ba agora primeira divizaun klube 8 de’it, segunda divizaun klube 12 entaun LFTL sei halo jogu Play of ida atu buka klube rua hodi sa’e ba primeira divizaun,” Diogo Neto Fraga esplika.

Jogu play of ne’e sei halo iha fevreiru nia laran ho sistema vota fora katak lakon sai no klube rua ne’ebé ultrapasa ba semi final, na’in rua ne’e mak sei hakat ba primeira divizaun no laiha tan jogu final.

Klube sira iha segunda divizaun mak hanesan, Academica FC, Atletico Ultramar, Nagardjo FC, Emanuel FC, AS Marca FC, Lica-Lica Lemorai FC, Kablaki FC, FIEL FC, Santa Cruz FC, FC Zebra no Sporting Clube de Timor. Tanba ne’e, jogu ne’ebé LFTL organiza iha 2021 sei joga hahú hosi fevreiru to’o setembru.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here