Xefe Bankada FRETILIN, Francisco Miranda Branco. Imajen Tatoli/Egas Cristovão

DILI, 22 dezembru 2020 (TATOLI)—Bankada Frente Revolucionária de Timor-Leste Independente (FRETILIN) husu Governu atualiza meta sira iha Planu Estratéjiku Dezenvolvimentu Nasionál (PEDN) ne’ebé ultrapasada.

“Ami haree kle’an no luan kona-ba ita-nia Planu Estratéjiku Dezenvolvimentu Nasionál ne’ebé di’ak maibé la’ós ita mak hakerek, ema seluk mak hakerek, ita selu de’it. Meta barak ita liutiha ona no la konsege atinje hanesan edukasaun no bee-moos. Tanba, bee-moos define katak 2015 bee-moos suli ba uma hotu-hotu, agora tinan lima (5) liutiha ona ema mak buka bee-moos entaun tenke atualiza fila-fali, meta balu ultrapasada,” Xefe Bankada FRETILIN, Deputadu Francisco Miranda Branco, ko’alia iha Parlamentu Nasionál, tersa ne’e.

Xefe bankada FRETILIN ne’e akresenta, atu re-define ne’e la presiza konsensu tanba uluk aprova PEDN ne’e aprova ne’e FRETILIN la konkorda.

“Tanba ami haree katak ita gasta osan boot hodi halo kontratu ho empreza ida hosi Indonézia mak hakerek planu ne’e,” nia hateten.

Iha loron 17 setembru 2020 liubá, Bankada Frente Revolussionária de Timor-Leste Independente (FRETILIN) husu re-avalia Planu Estratéjiku Dezenvolvimentu Nasionál (PEDN) tanba meta sira iha planu refere labele atinje no ultrapasada.

Reprezentante Bankada FRETILIN, Deputadu Joaquim dos Santos, fundamenta situasaun globál ho pandemia COVID-19, Timor-Leste konsege halo prevensaun ba ita-nia povu ho implementasaun Estadu Emerjénsia. Nune’e COVID-19 iha Timor-Leste sai de’it surtu no laiha transmisaun lokál ba komunidade, maske nune’e Timor-Leste tenke nafatin alerta tanba dadus atuál hatudu nasaun balun iha rejiaun maka sai sentru ba propagasaun COVID-19.

Bankada FRETILIN observa ba situasaun ne’e fó biban ba Timor-Leste hodi halo reflesaun hodi haree ba frajilidade sira.

“Liuliu atu hahú hanoin, oinsá bele minimiza ita-nia dependénsia ba rai-li’ur kuaze iha setór hotu hahú hosi ekonomia, agrikultura no peska, saúde, edukasaun no mós seluk tan. Ita presiza re-avalia PEDN liuliu tanba meta sira labele atinje ona no ultrapasadu. Katak tenke revitaliza fali planu sira, prioritiza ba diversifikasaun ekonómika hodi investe ba área poténsial sira seluk, hodi la depende de’it ba minarai,” Deputadu Joaquim dos Santos levanta liuhosi sesaun solene abertura lejizlativa Datoluk ba Lejizlatura Dalima, iha Parlamentu Nasionál, tersa ne’e.

Iha loron 17 setembru 2020 liubá, Bankada FRETILIN fundamenta, Timor-Leste  nia rai-bokur ba agrikultura ho luan ektare rihun ba rihun iha kosta-súl no iha parte balun iha kosta-norte.

Tanba ne’e Bankada FRETILIN sente katak, tempu atu Timor-Leste investe seriamente iha setór agríkola, governu tenke harii irrigasaun ho nia sistema ne’ebé bele asegura dezenvolvimentu setór importante ida-nee.

Nune’e mós harii barrajen sira ho dimensaun natoon ne’ebé bele rekolla bee iha tempu udan atu la husik bee suli hotu ba tasi. Governu mós tenke insentiva setór bankáriu halo injesaun kapitál ho jurus atrativu atu dada no dudu setór privadu ba investe iha agrikultura.

“Tempu atu Timor-Leste afirma nia-aan hanesan Estadu soberanu hodi kore-aan hosi dependénsia totál no eskluziva hosi rai-li’ur. Tanba laiha estratéjia polítika ida-ne’ebé mosu atu reforsa ita-nia independénsia maibé hametin liután ita-nia dependénsia ba rai-li’ur. Karik tanba ida-ne’e mak iha tinan 12 nia laran Estadu gasta biliaun $14 maibé setór produtivu sira hanesan agrikultura no turizmu sei hakdasak hela hamutuk ho edukasaun no saúde,”  Joaquim kestiona. 

Bankada FRETILIN fó hanoin, estratéjia dezenvolvimentu nasionál ba-oin labele de’it haree ba infraestrutura fízika no labele tau sees dezenvolvimentu naun-fíziku, mentalidade nu’udar povu ne’ebé iha istória sekulár presiza hametin.

“Ami komunga hanoin hanesan, ne’ebé rekomenda estratéjia desenvolvimentu ba oin sentradu ba ema. Dezenvolvimentu ne’ebé ba ema nia kabun, ba ema-nia isin no ema nia kakutak,” nia hateten.

Deklarasaun Bankada FRETILIN n’ebé leitura hosi Deputadu Joaquim dos Santos, subliña Timor-Leste iha merkadoria ida importante ne’ebé hetan apresiasaun mundiál mak kafé tanba ne’e Estadu Timor-Leste  tenke investe iha kafé.

Tanba tuir estudu ida halo hosi Universidade Monash Austrália, hatete karik Timor-Leste investe iha kafé millaun $154 mak sei hetan retornu billaun 11 no loke kampu serbisu ba ema rihun 77.

“Ita mós iha merkadoria seluk hanesan baunilla, ne’ebé sai ona familiár tebes iha ita-nia agrikultór sira-nia leet, tanba nia folin di’ak iha merkadu mundiál ho presu kilo ida dolar $400 no mós iha merkadu internu iha 2019 hetan folin kilo ida dolar $50 ba klase A no klase B dolar $45. Tanba ne’e presiza hetan atensaun hosi polítika Governu nian atu dezenvolve liután merkadoria ida-ne’e ho apoiu tékniku no karik bele fó akompañamentu ba sira hetan merkadu internu,” nia fó hanoin ba Governu.

Bankada FRETILIN akresenta, Timor-Leste iha poténsia boot ida-ne’ebé durante ne’e husik hela tasi ho área kosteira hamutuk kilometru atus-hitu-tolu-nulu ho nia superfísie tasi hamutuk kilómetru 2 75.000, Timor-Leste laiha formasaun adekuada ba peskadór sira atu hala’o peska ho di’ak.

“Ita laiha ró peska, ita laiha ró atu asegura ema labele mai na’ok ita-nia rikusoin iha tasi. Kada tinan ita lakon osan millaun $300, tuir rezultadu peskiza iha tinan 2011 hatudu por km2 bele kaer ikan 1,6 tonelada,” nia dehan.

Nune’e mós Timor-Leste halo parte Triángulu Korál hamutuk ho nasaun neen (6) hanesan Papua Nova-Giné, Salomaun, Indonézia, Malázia no Filipina. Iha área ida-ne’e mak eziste aprosimadamente 76% espésie korál sira, iha mós 52% especies de recifes Indo Pasifico, no mós iha área ida-ne’e mak moris floresta boot mangue (Mangrove) iha mundu.

“Iha ne’e maka sientista sira dehan fuan no pulmaun ekosistema marinho mundu nian. Infelizmente biodiversidade ida-ne’e amesadu tanba peska dezkontrolada sira no mós mudansa klimátika,” nia haklaken.

Bankada FRETILIN akresenta, triángulu Korál ne’e dala barak hanaran ‘Amazonia dos Mares’ tanba ho ekosistema ida folin boot liu iha mundu. Governante hosi nasaun hirak-ne’e no organizasaun internasionál sira ba ambiente konsidera hanesan prioridade urjente ba halo konservasaun.

Hatán ba kestaun ne’e, Deputada Bankada CNRT, Maria Fernanda Lay, argumenta meta sira PEDN ne’e ba tempu naruk maibé kada tinan lima depende ba planu governasaun ida-nian ne’ebé traduzida ba orsamentu kada tinan hodi implementa.

“Ita aprova PEDN ne’e iha situasaun balu ke tenke rekupera, ha’u sei lembra mak lori problema refujiadu ne’ebé lori fila ba sira-nia uma, ida-ne’e mós gastu osan, PEDN ne’e mós hanesan ODS ne’ebé planu mundiál hodi hamenus kiak, ne’e ajusta tanba meta balu ke ita liutiha ona,” nia dehan.

Nia haktuir, molok aprova planu ne’e liuhosi estudu barak no halo konsulta públiku iha territóriu nasionál.

“Ezemplu hanesan bee-moos ne’e iha dezafiu tanba bee-matan atu foti hosi ne’ebé,” nia hateten. 

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here