Atividade AIFAESA iha terrenu. Imajen/AIFAESA

DILI, 22 dezembru 2020 (TATOLI)Iha implementasaun programa kurtu prazu Cesta Bázika, Autoridade Inspesaun no Fiskalizasaun Atividade Ekonómika, Sanitária no Alimentár (AIFAESA) hola parte hodi halo monitorizasaun no avaliasaun.

Atividade ne’ebé AIFAESA halo bazeia ba despaisu númeru 14 husi Ministru Koordenadór Asuntu Ekonómiku (MKAE), Joaquim Amaral, hodi fó kompeténsia ba autoridade ne’e halo intervensaun, fiskalizasaun no monitorizasaun ba implementasaun Cesta Bázika, hahú husi ministériu no instituisaun implementadór sira.

Diretór Operasionál AIFAESA, Gabriel da Costa, hateten durante intervensaun no fiskalizasaun, autoridade identifika empreza balun distribui foos la tuir kuantidade ne’ebé maka prevee ona iha kontratu.

“Ami haree katak iha irregularidade ne’ebé mak mosu durante implementasaun Cesta Bázika iha kapitál Dili no munisípiu, populasaun sira kestiona presu no produtu sira la to’o kuantidade ne’ebé prevee iha kontratu. Ho preokupasaun ne’e maka ami halo intervensaun direta kedas, kuandu la to’o kuantidade ne’ebé mak determina maka AIFAESA husu ba implementadór tenke subtitui produtu,” Diretór Operasionál relata ba Agência TATOLI iha ninia knaar fatin, Matadoro, tersa ne’e.

Durante fiskalizasaun iha terrenu, ekipa autoridade nota katak foos kilograma lima, halo de’it ba kilograma haat no produtu balun tan ne’ebé kuantidade la to’o hanesan mensiona iha kontratu ho Governu.

“Ami halo kedas intervensaun direta hodi husu implementadór fó kilograma lima. Aleinde ne’e ami lori kedas ami-nia mákina hodi tetu sasán sira ne’e, kuandu la to’o no la tuir saida mak hakerek iha kontratu maka ami halo intervensaun kedan,” nia akresenta.

AIFAESA identifika produtu balun ne’ebé fuhuk ona.

“Sasán sira ne’e kuandu ami haree fuhuk ona, ami haruka hasai no tau foun,” Gabriel akresenta.

Tanba ne’e, autoridade inspesaun ne’e obrigatóriu halo observasaun atu identifika armazenamentu sira ne’ebé mak tau hamutuk produtu lokál.

“Ami tenke halo intevensaun direta hodi nune’e bele garante produtu sira ne’e bele fahe ba konsumidór sira ho kualidade no di’ak,” nia hatutan.

AIFAESA nia intervensaun durante ne’e liuliu iha kapitál Dili, bazeia ba preokupasaun públiku katak foos balun ne’ebé mak distribui husi loja balun ne’ebé partisipa troka voucher Cesta Bázika kahur ho foos importadu.

“Ami haree informasaun ne’ebé publika iha rede sosiál maka ami-nia ekipa tuun direta halo intervensaun hodi foti kedas foos ne’e halo teste iha laboratóriu no rezultadu hatudu katak foos ne’e orijinál ka foos lokál duni husi Sentru Lojíztika Nasionál (CLN, sigla portugés) no merese atu halo distribuisaun tanba la kahur ho foos importadu,” Dirijente ne’e haktuir.

Nia dehan, durante ne’e ekipa autoridade halo akompañamentu ba implementasaun Cesta Bázika husi nasionál to’o suku no parte rekursu sufisiente.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here