Telekomunikasaun uza fibra óptika. Imajen/Espesiál

DILI, 21 dezembru 2020 (TATOLI)Governu prevee millaun $41,588 iha verba Fundu Infraestrutura (FI) hodi halo akizisaun ekipamentu informátika kabu submarinu atubele ezekuta projetu ne’e iha tinan oin.

“Daudaun ne’e ekipa tékniku sira hala’o hela diskusaun ne’ebé aprova ona. Ha’u hanoin tinan oin (2021) bele ezekuta tuir programa no kalendáriu ne’ebé iha,” Vise Primeiru-Ministru no Ministru Planu no Ordenamentu, José Maria Reis, hateten hafoin partisipa iha Konsellu Ministru, iha Pálasiu Governu, segunda ne’e.

Hatan ba risku seguransa nasionál, governante ne’e dehan ekipa tékniku mós prevene ona estratejia hodi responde kestaun ne’e.

“Nia risku sempre iha, ne’ebé ita prevee ona atu ekipa tékniku sira antisipa,” nia akresenta.

Ezekutivu sira deside prevee orsamentu ne’ebé liuhosi desizaun Konsellu Administrasaun Fundu Infraestrutura (KAFI) no Konsellu Ministru delibera no aprova projetu ligasaun kabu submarinu liga husi Austrália mai Timor- Leste.

Ba ekipamentu informátika, ligadu ba fibra óptika, aloka millaun $41,5 iha orsamentu tinan fiskál 2021.

Ministériu Planu no Ordenamentu (MPO) inklui ministériu relevante sira hahú ona serbisu atu asegura ligasaun kabu submarinu.

Polítika dada kabu submarinu hosi Darwin mai Timor-Leste nu’udar prioridade Governu ho kooperasaun Governu Canberra, ho objetivu atu eleva kapasidade rede internet iha rai laran, tanba VIII Governu Konstitusionál mós iha programa e-goverment, ne’ebé bainhira atu realiza presiza iha liña internet ho lais.

Governu liuhosi sorumutuk Konsellu Ministru (KM), kuarta (04/11), delibera no aprova projetu ligasaun kabu submarinu ne’ebé liga hosi Austrália mai Timor-Leste.

Ho aprovasaun projetu deliberasaun ne’e maka iha tempu oin mai parte Ministériu Planu no Ordenamentu, inklui ministériu relevante-sira hahú ona serbisu atu asegura ligasaun kabu submarinu.

Antes ne’e, Primeiru-Ministru, Taur Matan Ruak, propoin orsamentu ho montante millaun $41 ba nesesidade instalasaun kabu submarinu (fibra ótika) ne’ebé sei dada hosi territóriu Norte Australia nian.

Investimentu ne’e, Taur Matan Ruak hateten, Timor-Leste mós hanesan nasaun ida ne’ebé presiza ligadu ho internet liuhosi kabu fibra ótika, teknolojia, via satélite, ida-ne’e, neineik liu, ladún viavel no karu liu.

Tuir dadus 2019 nian husi Seasia.co, Timor- Leste iha velosidade internet neineik liu daruak iha mundu no velosidade neineik liu dala-25 husi velosidade média iha Ázia no iha Pasífiku tomak.

Taur hatutan hodi argumenta tan, iha 2021 Governu hakarak atu transforma Timor-Leste konetividade internet.

Enkuantu, Governu liuhosi Ministériu Transporte no Komunikasaun (MTK) aluga bandwith ho kapasidade 200 megabyte/segundu hodi fahe ba instituisaun Estadu sira hamutuk 140.

Aleinde ne’e, Governu iha ona planu atu atualiza husi kapasidade 200 megabyte/segundu ba 1 gigabyte/segundu, atubele ajuda bainhira seidauk iha rede fibra óptika.

Jornalista : Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here