Imajen/Embaixada Japaun

DILI, 21 dezembru 2020 (TATOLI)-Embaixada Japaun iha Dili, ohin, asina  kontratu ho ONG lokál  Haburas Dezenvolvimentu  Talentu (HADEZTA) ba  projetu konstrusaun postu saúde iha Suku Souro, Postu Administrativu Lospalos, Munisípiu Lautem ho montante orsamentu $90,900.

Apoiu ne’e liuhosi programa asisténsia Japaun nian hanaran eskema “Fundu Asisténsia ba Seguransa Umana (GGP)’’.

Kontratu ne’ebé  asina iha Embaixada Japaun nian iha Dili, hala’o diretamente hosi Embaixadór  Japaun mai Timor-Leste, Masami  Kinefuchi ho Diretór HADEZTA, Francisco de Araújo no Ministra Saúde (MS), Odete Maria Freitas Belo, nu’udar sasin.

Iha diskursu, Masami  Kinefuchi, apresia tebes servisu maka’as hosi  HADEZTA  ba preparasaun projetu ne’e, maibé ida-ne’e foin hanesan pontu inísiu.

“Ita boot sira-nia esforsu tuir mai sei importante tebes atu asegura konstrusaun postu saúde ne’e sei remata,” embaixadór Masami  Kinefuchi  hateten.

Diplomata hosi nasaun Sakura ne’e mós husu  Governu lokál Munisípiu Lautem atu suporta ho di’ak ba projetu ne’e hafoin konstrusaun ne’e.

“Ikus liu ha’u mós hakarak fó obrigadu  no apresia ba membru Governu  ba kooperasaun  projetu sira uluk no dezeju  katak projetu ne’e sei hetan apoiu maka’as no susesu hosi projetu ne’e  lori prosperidade ba Timor-Leste,’’ Masami  Kinefuchi  tenik.

Iha fatin hanesan Ministra Saúde,  Odete Maria Freitas Belo, hato’o agradese ba apoiu Governu Japaun nian  ne’ebé dezde uluk to’o mai ohin loron  kontinua hatudu sira-nia kompromisu boot hodi apoiu dezenvolvimentu Timor-Leste nian  iha area saúde no sira seluk tan.

Projetu  GGP   ho objetivu atu hadi’a asesu ba servisu kuidadu saúde ba komunidade sira iha area remota no Governu Japaun deside apoiu  fundu ba ONG lokál HADEZTA atu implementa projetu ne’e bele hahú hala’o konstrusaun fíziku iha tinan oin.

Postu ne’e mós sei benefisia komunidade 3,744 iha Suku Souro hodi hadi’a asesu ba servisu kuidadu saúde no mós ba sira-nia kualidade moris nian.

Jornalista: Nelson de Sousa

Editór: Francisco Simões

HAKEREK NO HATÁN

Please enter your comment!
Please enter your name here