Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristovão

DILI, 21 dezembru 2020 (TATOLI)Governu liuhosi reuniaun Konsellu Ministru aprova ho alterasaun projetu proposta lei kona-ba enkuadramentu Orsamentu Jerál Estadu (OJE) no jestaun finanseira públika.

Projetu ne’e aprezenta husi Ministru Finansa, Rui Augusto Gomes no hetan ona aprovasaun iha reuniaun ezekutivu.

Ministru Prezidénsia Konsellu Ministru, Fidelis Manuel Leite Magalhães, relata projetu proposta lei ne’e propoin enkuadramentu foun ida ba OJE no ba jestaun finanseira públika, hodi substitui Lei númeru 13/2009, husi 21 outubru kona-ba Orsamentu no Jestaun Finanseira.

“Projetu ne’e halo alterasaun balun no hadi’a rejime Orsamentu Jerál Estadu no jestaun finanseira públika, atu nune’e aumenta klareza, estabilidade, fleksibilidade no transparénsia,” relata Ministru Fidelis, hafoin reuniaun KM, iha Palásiu Governu, segunda ne’e.

Aleinde ne’e, alterasaun diploma ne’e destaka ba alterasaun definisaun perímetru orsamentál, planeamentu ba programasaun orsamentál plurianuál, adosaun orsamentasaun tuir programa, rejime prorrogasaun OJE ba rejime ezekusaun duodesimál no ba melloria informasaun orsamentál ne’ebé prodús.

Enkuantu proposta lei ne’e sei hato’o ba Parlamentu Nasionál hodi nune’e bele inisia interna Parlamentu no Governu mós sei ba hatán.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here