Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, Segunda (21/12). Imajen TATOLI/Egas Cristovão

DILI, 21 dezembru 2020 (TATOLI)Governu liuhosi reuniaun Konsellu Ministru (KM) aprova alterasaun dahuluk ba dekretu-lei númeru 48/2020, loron 07 outubru ba atribuisaun Cesta Bázika.

“Aprovasaun ne’e adota medida sira ba apoiu família ho atribuisaun Cesta Bázika no ba operadór ekonómiku lokál sira iha ámbitu planu rekuperasaun ekonómika no kria rejime espesiál aprovizionamentu,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata enkontru KM, iha Palásiu Governu, segunda ne’e.

Projetu dekretu-lei ne’e aprezenta husi Ministru Koordenadór Asuntu Ekonómiku, Joaquim Amaral.

Objetivu alterasaun ne’e tanba hafoin ministériu implementadór ne’ebé lidera husi Ministériu Koordenadór Asuntu Ekonómiku (MKAE) halo avaliasaun, identifika problema no presiza iha alterasaun iha parte balun hodi fó solusaun normativu sira ne’ebé hatuur ona iha diploma ho ezekibilidade no efikásia ne’ebé boot liu.

Tuir diploma ministeriál konjuntu númeru 38/2020, 26 outubru, produtu ne’ebé tama lista programa Cesta Bázika maka, produtu alimentár, kompostu husi foos, batar, kote/fore, amendoim, sorgum dulas, kafé, masin, fehuk ropa, susu ben, masin midar, manu, manu tolun, mina tein, mina nú, trigu, inklui modo sira hanesan ervilla, tomate, koto nurak, fore sikote, repollu, kouve, modo metan, modo mutin no modo seluk tan.

Enkuantu ba produtu ijiene maka, sabaun, álkool jel, deterjente, eskova nehan no pasta nehan.

Programa Cesta Bázika, membru idaidak agregadu familiár sei hetan $25, kada fulan iha fulan-rua nia laran no bele troka ho folin sasán ne’ebé korresponde ba valór osan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here