Jogadora Maranatha haksoit tebe bola hodi hasai bola hosi jogadora S'Amuser. Imajen/FFTL

DILI, 19 dezembru 2020 (TATOLI) – Ekipa feminina S’Amuser FC sai hanesan terseiru lugár iha Tasa Rosa “Muki” Bonaparte  2020 hafoin halakon Maranatha FC 4-1.

Notísia Relevante : Banda múzika tolu anima iha finál Tasa Rosa “Muki” Bonaparte

Jogarora na’in-rua Maranatha nian atake metin jogadora S’Amuser. Imajen/FFTL

Liuhosi jogu ne’ebé hala’o iha Estádiu Munisipál Dili, sábadu (19/12),  ekipa jogadora Maranatha tenke simu nia derrota no apresia jogadora S’Amuser sira-nia kbiit no abilidade iha halimar bola kabuar iha kampu-laran.

Iha jogu entre parte rua ne’e hala’o iha ámbitu ne’ebé kumpre ba espíritu fair play. Mezmu dala-balun jogadora sira hosi parte rua sukit malu uitoan-uitoan no selok malu iha kampu laran.

Vitoria ne’ebé S’Amuser hetan lori ekipa ne’e iha direitu absolutamente okupa iha pozisaun terseiru lugár. Enkuantu Maranatha hela ho kuartu lugár.

Golu vitória S’Amuser  prodús hosi jogadora Dolores da Silva (7) iha minutu ‘1, 45+3, ’85, Leticia Soares (8) ’70 no golu úniku Maranatha nian hatama hosi jogadora Deonizia Barreto (17) iha minutu ’35.

Prémiu ba terseiru lugár sei simu osan hamutuk $2,000 no kuartu lugar $1,500. Enkuantu primeiru lugár sei hadau malu hosi ekipa rua; AD.  SLB Laulara vs Buibere ne’ebé jogu ne’e sei hala’o domingu (20/12) iha Estádiu Munisipál Dili.

Entre AD. SLB ka Buibere mak sai kampiaun karik ba Tasa Rosa “Muki” Bonaparte 2020, merese simu prémiu osan $3,000 no ida ne’ebé sai segundu lugár simu $2,500.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here