Logotipu UNPAZ

DILI, 19 dezembru 2020 (TATOLI) – Universidade da Paz (UNPAZ) ba tinan akadémiku 2020, prodús graduadu nivel lisensiatura na’in-1,412 no mestradu na’in-24.

Ho númeru estudante finalista nivel lisensiatura ho nivel mestradu hamutuk na’in-1,436 ne’e ladún hetan espasu di’ak iha UNPAZ atu bele halo serimónia gradasaun dala ida de’it iha loron ida.

Magnífiku Reitór UNPAZ, Adolmando Soares Amaral ho nia komisaun organizadora ba Graduasaun tinan akadémiku 2020 deside serimónia graduasaun fahe ba faze rua; dahuluk, hala’o sábadu ne’e ho total graduadu na’in-748 (inklui ona graduadu nivel mestradu na’in-12) no faze daruak nian, hala’o segunda (21/12), ba graduadu na’in-688 (inklui mós graduadu nivel mestradu na’in-12).

Estudante finalista sira nivel lisensiatura ne’ebé simu graduasaun ba tinan akadémiku ne’e hosi fakuldade neen (6) mak estabelese iha UNPAZ, kompostu hosi Fakuldade Siénsia Sosiál no Umana, Fakuldade Saúde Públiku, Fakuldade Teknolojia Agríkola, Fakuldade Enjeñeira, Fakuldade Ekonomia, Fakuldade Direitu.

Ba graduadu sira ho nivel mestradu na’in-24 hosi Administrasaun Públiku, Siénsia Saúde Públiku, Direitu, Relasoins Internasionál, Jestaun Bankária, Agrikultura no Akuntabilidade.

Magnífiku Reitór UNPAZ, Adolmando Soares Amaral hateten bá graduadu sira katak buka haka’as-aan nafatin atu sai figura ida ne’ebé iha poténsia no kbiit iha komunidade nia leet.

“Siénsia ida ne’ebé mak graduadu sira hetan durante hamahan-aan iha UNPAZ ne’e nu’udar bukae ida. Maibé, matenek ne’ebé mak graduadu sira sei hetan liután mak oinsá atu servisu hamutuk iha komunidade no atu bele lori dezenvolvimentu iha sosiedade no mós ba nasaun ida ne’e,” Adolmando Soares Amaral hateten.

Graduasaun ba estudante finalista sira iha nivel ensinu superiór hanesan ona tradisaun ida, tanba ne’e, tinan-tinan UNPAZ sempre fó graduasaun ba nia estudante finalista sira nu’udar ensinu superiór ne’ebé hetan akreditasaun hosi Estadu.

Jornalista   : Tomé Amado

 Editór       : Francisco Simões

HAKEREK NO HATÁN

Please enter your comment!
Please enter your name here