Prezidente Partidu CNRT, Kay Rala Xanana Gusmão. Imajen/Eugénio Pereira

DILI, 18 dezembru 2020 (TATOLI)—Prezidente Partidu Congresso Nacional de Reconstrução de Timorensse (CNRT), Kay Rala Xanana Gusmão, husu ba kuadru sira prepara-aan hametin partidu CNRT nune’e mantein pozisaun defende no valoriza konstituisaun RDTL.

Xanana husu kuadru partidu CNRT fiar-aan tanba partidu refere mosu iha krize atu rezolve krize iha rai ida, konsege rezolve problema IDP’s (refujiadu sira) tanba ne’e tenke lori bá-oin.

“Ita tenke prepara-aan hametin liután partidu ho hanoin luan no hanoin loloos. Labele ta’uk rekoñese sala. Hadi’a-aan, atu ita bele sai instrumentu ida, nune’e defende no valoriza konstituisaun,” Xanana ko’alia kestaun ne’e bainhira selebra Natál hamutuk no prepara-aan simu tinan 2021 iha sede partidu CNRT, Bairro dos Grilhos, sesta ne’e.

Iha Natál hamutuk ne’e mós partisipa hosi Eis Prezidente Repúblika, José Manuel Ramos Horta no militante partidu CNRT nian.

Maibé Eis Primeiru Ministru fó hanoin ba kuadru, militante sira katak bá­-oin  tenke halo koordenasaun servisu ne’ebé koletiva, fahe esperiénsia no fahe matenek ba malu hodi hametin partidu refere.

“Ita tenke tuir dalan legál no konstitusionál. Ita hein katak to’o tempu ho Maromak nia tulun, ita bele lori fali povu ne’e ba fali dalan loos ne’ebé sira mós hein hela. Importante ba ita, husu nafatin ba Maromak nia tulun, ita hodi konsolida-aan, se CNRT mosu iha situasaun ne’ebé aat tebes. Ohin loron, ita tenke hakaa’as-aan atu konsolida-aan. Bainhira ita konsolida tiha-aan nu’udar partidu mak ita bele valoriza no defende konstituisaun,” Xanana alerta ba kuadru sira.

Maibé nia fó hanoin tán, se la konsolida-aan nu’udar partidu, sei la konsege defende no la valoriza konstituisaun repúblika. Tanba ne’e fiar ba Maromak, matebian no rai-lulik atu ajuda partidu CNRT.

Xanana subliña, bainhira kuadru partidu sira lakohi rona malu no dook-malu de’it, ne’e susar atu la’o bá-oin.

“COVID-19 kleur tiha ona tanba ohin reflesaun ba ita katak fiar ba Maromak, lalika ta’uk no husu nafatin Maromak nia grasa no tulun. Ita-nia ta’uk atu ofende-aan rasik. Ha’u labele dehan fali ha’u halo sala, hasai hotu tiha buat sira-ne’e. Ha’u temi hotu buat sira-ne’e tanba ita hotu família boot partidu ninian. Hasai tiha ita-nia ta’uk hosi ita-nia fo’er, labele hanoin ha’u mak halo liu iha partidu, ne’e ita la konsolida-aan,” Eis Prezidente Repúblika ne’e hateten.

Xanana akresenta, ema hotu nia hanoin ne’e sempre iha sala tanba hanoin mak prodús hahalok la’ós hahalok mak prodús hanoin.

“Se hanoin dehan bainhira mak ita manán hodi sai membru Governu, se hanoin hanesan ne’e ita sei la konsolida ka hametin partidu. Di’ak liu ita taka tiha kios ne’e,” Xanana hateten.

Xanana mós rekoñese partidu CNRT iha problema tanba ne’e tenke konsolida-aan ba-oin, nune’e partidu bele sai forte liután.

Jornalista: Evaristo Soares Martins

Editór: Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here