Grupu peskadór iha munisípiu Dili simu ró peska husi SEP, iha Sionál, sesta (18/12). Imajen TATOLI/Natalino Costa

DILI, 18 dezembru 2020 (TATOLI)—Sekretaria Estadu Peska (SEP) iha tinan 2021 planeia atu sosa tan ró peska hamutuk unidade 110 hodi distribui ba peskadór sira bele hodi hala’o atividade di’ak liután.

Sekretáriu Estadu Peska, Elídio de Araujo, konsiente nu’udar instituisaun tutela ba área peska, kontinua luta nafatin ba atividade peskadór nune’e sira bele moris ho dignu.

“Ita kontinua luta ba peskadór sira, ita rejista  Timor-Leste iha peskadór hamutuk 5.244 no husi totál ne’e fahe ba grupu 1.063. Tanba ne’e ró ba peskadór sira ne’ebé maka iha sei menus no ita presiza luta nafatin. Ita iha planu orsamentu 2021  ba SEP  propoin tan ró peska  hamutuk 110, ne’ebé orsamentu ne’e rasik pasa ona iha Parlamentu,” Sekretáriu Estadu Elídio informa ba Agência TATOLI, sesta ne’e, hafoin entrega ró 10 ba grupu peskadór sira, iha Sionál, Dili.

Notísia Relevante: SEP apoia ró peska sanulu ba grupu peskadór halo atividade

Tuir governante ne’e, ho orsamentu 2019 Governu konsege sosa ró ba peskadór hamutuk unidade 38 ne’ebé sei distribui ba munisípiu 10, kompostu husi Lautém tolu, Baucau neen, Manatuto ida, Same ualu, Ainaro rua, Dili sanulu, Liquiçá ida, Maliana hitu no munisípiu Suai no Viqueque maka seidauk distribui.

Tuir planu, ró ne’ebé sei sosa tinan oin sei fahe ba munisípiu hotu la inklui Aileu no Ermera.

Polítika SEP tinan 2021  maka kontinua nafatin fó prioridade ba peskadór iha munisípiu 10, ne’ebé kada munisípiu sei hetan ró 10, maibé Aileu no Ermera  mak lae tanba laiha tasi.

“Tanba munisípiu rua ne’e laiha tasi, Governu iha planu atu promove ikan bebida. Meta Governu nia iha tinan 2023, ema ida kada tinan konsumu ikan kilograma 10, tanba ne’e atu atinje ita tenke kompleta ekipamentu ba komunidade peskadór sira,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here