Plenária Parlamento Nasionál. Imajen TATOLI/Egas Cristovão

DILI, 18 dezembru 2020 (TATOLI)—Parlamentu Nasionál konvida Ministra Negósiu Estranjeiru no Kooperasaun (MNEK), Adaljiza Albertina Xavier Reis Magno, hodi partilla informasaun kona-ba Timor-Leste nia prosesu adezaun ba  Asosiasaun Nasaun sira iha Sudeste Aziátiku (ASEAN-sigla inglés).

Ajenda dala-ikus ne’e aprova liuhosi konferénsia reprezentante líder bankada parlamentár deside segunda (21 dezembru 2020) sei realiza plenária dala-ikus.

“Ohin, aprova ona ajenda ba plenária dala-ikus 2020 nian ne’ebé sei hala’o iha segunda-feira, 21 dezembru, ho ajenda mak atu halo debate ho Ministra Negósiu Estranjeiru no Kooperasaun atu partilla informasaun kona-ba ita-nia adezaun ba ASEAN,” Vise Sekretáriu Meza Parlamentu Nasionál, Deputadu António Nobre Tilman, informa liuhosi konferénsia imprensa, iha Parlamentu Nasionál, sesta ne’e.

Konferénsia reprezentante bankada parlamentár ne’e prezide hosi Prezidente Parlamentu Nasionál, Deputadu Aniceto Longuinhos Guterres Lopes, ne’ebé akompaña Vise-Prezidente Maria Angelina Lopes Sarmento no Luis Roberto da Silva no xefe bankada parlamentár sira.

Vise-Sekretáriu Meza Parlamentu Nasionál fó-sai katak, iha plenária dala-ikus ne’e sei baixa lei balun ba komisaun espesialidade permanente sira.

Nia dehan, posibilidade iha 31 dezembru sei iha plenária estraordinária kona-ba renovasaun deklarasaun Estadu Emerjénsia maibé depende proposta Governu nian ba Prezidente Repúblika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here