MOP hadia ona estrada dirasaun Manatuto ba Natarbora. Imajen/Mídia-MOP

BAUCAU, 18 dezembru 2020 (TATOLI)—Ministru Obras Públika, Salvadór Pires, hateten reabilitasaun estrada nasionál ne’ebé ligasaun entre Baucau-Lautém no Baucau-Viqueque nia pursentu komesa sa’e ona tanba bazea ba Orsamentu Jerál Estadu (OJE) tinan fiskál 2021 nian, Ministériu Obras Públika prevee ona tokon $105 ba estrada iha territóru Timor-Leste tomak hamutuk 6000 ne’ebé iha ona planu atu hadi’a.

“Kona-ba Estrada, ita-boot sira hatene katak Estrada iha teritóriu Timor-Leste tomak hamutuk rihun 6 resin. Ne’ebé, estrada nasionál ligasaun Baucau-Lautém ne’e atinje ona pursentu 79%, Estrada ligasaun Baucau-Viqueque atinje ona 17%. Daudaun ne’e Governu liuhosi Ministériu Obra Públika (MOP) tau ona osan hamutuk tokon $105 ba fundu infraestrutura ba estrada, la’ós estrada munisipál de’it maibé projetu on going, estrada urbana no seluk tan ne’ebé sei halo,” Ministru Obras Públika, Salvador Pires, hateten liuhosi diálogu entre Prezidente Repúblika ho populasaun iha Baucau ne’ebé realiza iha resintiu Administrasaun Munisípiu Baucau, Baucau Vila Nova, foin lalais ne’e. 

Nia akresenta, estrada ba Postu Administrativu iha Munsípiu Baucau kuaze lubuk ida mak tama ona iha planu.

“Estrada ligasaun Laga-Baguia, ponte Samalari, Laisorulai, Waikala tama ona iha planu, ne’ebé ita bele implenta tanba ita-nia estudu ne’e sei finaliza iha inísiu 2021 nian,” governante ne’e haktuir.

Nia dehan, estrada rurál ne’e halo reabilitasaun periódika, hanesan ligasaun Postu Administrativu Venilale, Suku Uaioli mós tama hotu ona iha planu, ne’ebé totál kilometru150 iha Munisípiu Baucau nian.

Governante mós apelu ba públiku katak, estrada rurál ne’ebé dadaun halo reabilitasaun ne’e projeitu la’ós ILO nian, maibé ne’e Governu Timor-Leste mak tau osan para halo reabilitasaun. Ne’ebé ILO ne’e hetan fali servisu hosi parseiru dezenvolvimentu TL nian hanesan Austrália para halo kapasitasaun ba traballdór no ministériu rasik.

Entretantu, governante ne’e hatutan, estrada rurál ne’ebé halo reabilitasaun periódika, hanesan ligasaun Postu Administrativu Venilale Suku Uaioli mós tama ona iha planu 2021 nian ho totál kilometru ualu (8).

Governante ne’e haktuir katak la’ós de’it iha Venilale-Uaioli maibé dirasaun hosi Postu Administrativu Quelicai mós faze reabilitasaun nian no estrada seluk iha Munisípiu Baucau tomak.

Iha fatin hanesan, Xefe Suku Uatuhaco, Crisogno Correia, hateten iha ona planu pozitivu hosi MOP atu hadi’a estrada Venilale-Uaioli.

“Loos duni MOP ho nia ekipa halo ona survei direitamente, ho ne’e, karik MOP sei koopera ho ILO hodi hadi’a estrada dirasaun Postu Administrativu Venilale ba Uaioli no Osogori nian,” Xefe Suku ne’e informa.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here