Prezidente Conselho de Imprensa, Virgilio Guterres. Imajen/Dokumentasaun Tatoli.

DILI, 18 dezembru 2020 (TATOLI)—Prezidente Conselho de Imprensa (CI), Virgílio da Silva Guterres, ohin, husu ba jornalista sira sai nafatin naroman no fitun ne’ebé hatudu dalan ba sosiedade tomak.

Nia hatutan, selebra natal nu’udár sarani katólika sempre hanoin buat rua  mak anju no liurai na’in tolu ne’ebé mai vizita kosok-oan Jesus ne’e. Anju ne’ebé fó hatene ba bibi-atan sira katak maksoin moris ona tanba terminolojia “anju” ne’e nia signifika “lori mensajen”.

“Ha’u-nia mensajen mak jonalista sai nafatin anju ne’ebé lori mensajen di’ak ba ita-nia ouvintes, telespetadores no sosiedade tomak, tanba jornalista nia dever fó hatene lia-loos ba sosiedade. Tanba ne’e, fó nafatin esperansa ba sosiedade katak moris ne’e bele susar maibé esperansa mak labele lakon,” Virgílio da Silva Guterres hato’o nia mesajen natal nian iha serimónia atribuisaun karteira profisionál ba jornalista sira no natal hamutuk iha Salaun Delta Nova, Dili sesta ne’e.

Nia hatutan, maske agora mensajen sira-ne’ebé jornalista sira divulga dala-barak halo ema lagosta maibé nu’udár ema profisionál tenke hatutan nafatin papél josnalista nian ba públiku.

“Ita-nia novidade barak-liu halo ema hanesan stress no liuliu ita-nia na’i-ulun polítiku sira bainhira haree ita-nia informsaun. Maibé ida-ne’e mak ita-nia papél hanesan mensajeiru ne’ebé ita kontinua sai nafatin anju atu nai ulun sira gosta ka lagosta, ita tenke públika informasaun tanba sosiedade presiza hatene informasaun no importante mak informasaun ne’e faktu tanba faktu ne’e mak sagradu ba ita jornalista sira,” Virgílio esplika.

Tanba, nia haklaken, jornalista aleinde sai hanesan “fitun” sai mós hanesan “liurai na’in tolu” ne’ebé lori sira-nia prezente la’o tuir fitun-nia naroman to’o hetan Jesus Na’i Maksoin.

“Hanesan Liurai Na’in tolu la’o tuir fitun nia naroman ikus mai hetan Jesus. Entaun, ita jornalista no orgaun komunikasaun sira iha sosiedade demokratika ida-ne’e, ita tenke sai fitun ba ita-nia sosiedade,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here