Eis Prezidente Republika, Jose Ramos Horta hasai foto hamutuk ho Reitor no Dosente ISJB.Imajen/Hortencio Sanchez.

LIQUIçA,17 dezembru 2020 (TATOLI)—Insitutu São João de Brito (ISJB) Casait, Suku Ulmera Postu Administrativu Bazartete Munisípiu Liquiça, kinta ne’e, fó ona graduasaun ba estudante finalista husi Fakuldade Edukasaun hamutuk ema na’in 20.

Magnífiku Reitór ISJB Pe. Fidelizio Hornai Pereira,  hatete graduasaun ne’e realiza ba dala rua ona.

“Ami nia institutu ida ne’e halo graduasaun ba dala rua ona, sira ohin gradua ne’e sira mak hanesan segundu grupu ba ami-nia institutu ida ne’e. Ha’u agradese tebes tanba sira gradua tuir tempu no prodúz ona estudante ne’ebé matenek no iha abilidade,” Reitór ISJB ne’e informa ba Tatoli, hafoin ramata serimonia graduasaun ne’e iha eskola St.Inácio de Loiola Casait.

Nia dehan, institutu ne’e  iha de’it Fakuldade Edukasaun fahe ba departementu Inglés, Portugés no Edukasaun relijioza.

Insitutu São João de Brito (ISJB) Casait harii iha 2016 liubá no iha grupu primeiru ne’ebé gradua tinan kotuk hamutuk na’in 14 iha fakuldade ne’ebé hanesan.

Iha fatin hanesan, Eis Prezidente Repúblika José Ramos Horta, ne’ebé partisipamós iha serimonia graduasaun ne’e hato’o ninia votus parabens ba padre Jejuita sira tanba kontribui ba dezenvolvimentu liliu iha área edukasaun hodi prodúz Timorona barak.

“Lori nasaun tomak nia naran hato’o obrigadu ba amu sira ne’e harii institutu ida ne’e ho sira nia meiu rasik, ho orden Jejuita sira hosi igreja sira iha Austrália no Europa nia apoiu , ha’u fó obrigadu no agradese tebes,” Horta hateten.

Entretantu, ISJB daudaun ne’e iha estudante 230, iha dosente hamutuk permanente na’in 25, part time na’in 5, no dosente ne’ebé hanorin kada semana iha na’in 30.

Husi dosente sira ne’e na’in 1 husi Alemaña, Índia na’in 1 no Filipina na’in 1 no maioria Timoroan.

Institutu ne’eiha sala aprendizajen hamutuk 11, kada sala akumula estudante na’in 30 iha sala ida ba komputadór 12 kompleta ho internet hodi fasilita estudante sira, iha biblioteka no seluk tan.

Jornalista: Hortencio Sanchez/Tomé Amado

Editór :Agapito dos Santos

HAKEREK NO HATÁN

Please enter your comment!
Please enter your name here