. Udan hapara diálogu entre Prezidente Repúblika ho populasaun Baucau. Imajen/Espesiál.

BAUCAU, 17 dezembru 2020 (TATOLI)—Populasaun ua’in ba ua’in mak ho entuziasmu hodi tuir diálogu entre Prezidente Repúblika, Francisco Guterres Lú Olo, ho populasaun Munisípiu Baucau iha Resintu Salaun Administrasaun Munisípiu Baucau iha Vila Nova, Baucau, kuarta ne’e.

Diálogu Prezidente Repúblika ho populasaun ne’e hahú hala’o abertura iha tuku 09:30 dadeersan no konsege la’o normál to’o tuku 12:36 loron-manas. Maibé iha tuku 12:37, udan hahú monu rai no iha tuku 12:41, udan-been nakfakar hosi kalohan hetok boot ba beibeik.

Populasaun ne’ebé hamriik iha tenda nia liur, ida-idak buka dalan hodi sena malu no bou hamutuk iha tenda nia okos. Intensaun ida de’it, sira hakarak tebes atu rona saida mak Prezidente Repúblika no membru Governu sira ko’alia hodi hatán ba sira-nia preokupasaun.

.
Udan hapara diálogu entre Prezidente Repúblika ho populasaun Baucau. Imajen/Espesiál.

Udan-been nakfakar hetok boot ba beibeik. Populasaun balun sei bele hamriik iha tenda nia liur hodi uza salurik (sumbrellu) atu tahan netik udan-been. Sira hamriik habit malu iha salurik ida-nia okos. Tuba rai metin. Hakarak no hakarak atu rona esplikasaun ne’ebé suli hosi Xefe Estadu no membru VIII Governu Konstitusionál sira-nia ibun.

Iha tenda nia okos, maske udan makaas, Ministru Administrasaun Estatál (MAE), Miguel Pereira de Carvalho, koko hatán ba populasaun nia preokupasaun. Bainhira fó klarifikasaun ba populasaun nia lia-hahusuk ne’e, nia tenke hamriik iha udan laran hodi taka salurik. Udan hetok boot. Lian sira barullu ba-mai.

Populasaun hahú lakon konsentrasaun atu rona. Sira halai namkari. Udan ne’ebé boot, bele hamatak rai maibé nia mai hapara tiha diálogu ne’e la to’o nia rohan. Iha udan laran, Prezidente Repúblika, Francisco Guterres Lú Olo, hamriik hodi tatoli lia-tatoli ba populasaun.

.
Udan hapara diálogu entre Prezidente Repúblika ho populasaun Baucau. Imajen/Espesiál.

“Prezidente Repúblika hakarak hatán ba imi-nia preokupasaun hotu maibé situasaun mak la permite, entaun imi-nia preokupasaun hotu, ha’u sei rejista hotu depois ha’u enkamiña ba Governu para bele hatán ba preokupasaun sira-ne’e. Ne’ebé, ha’u husu ba imi, se imi hatán, ita ramata ita-nia diálogu to’o ba ne’e,” Prezidente Repúblika, Francisco Guterres Lú Olo, hateten hodi taka diálogu ne’ebé ho tema “Dada-Lia ho Lú Olo, Diálogu Sei Hetan Solusaun ba Problema Ne’ebé De’it,” kinta ne’e.

Rona Xefe Estadu nia liafuan ne’e, populasaun konkorda hodi bele hakotu diálogu ba loron ohin nian tanba de’it udan halo Sidade Baucau sai nakukun be nakukun. Iha biban ne’e kedas, Reprezentante Administradór hosi Postu Administrativu Baucau Vila, Francisco Ximenes, entrega hela ai-oan simbolikamente ba Prezidente Repúblika, molok husik hela populasaun no fatin diálogu ne’e.

Lalehan hetok nakukun no udan-been nakfakar tun ba rai, halo ema hotu haksumik aan iha uma nia tatis no sena malu iha fatin maran. Hosi matan ba matan, populasaun haree malu ho laran triste, tanba sira-nia preokupasaun PR no membru Governu sira la konsege hatán. Maibé, iha populasaun nia oin, sei bele iha ksolok ida-nia restu be nabilan katak PR sai duni “Prezidente ba Povu Tomak”.

.
Udan sobu diálogu entre Prezidente Repúblika ho populasaun Baucau. Imajen/Espesiál.

“Iha tinan balun ba kotuk, ha’u-nia uma lisan fó sai ha’u iha Aeroportu Baucau bainhira hahú kampaña. Iha ne’ebá, tiu ida dehan ho lian Makasae katak Lú Olo ami mai fase ó-nia liman, ain para hasoru loron no fulan ne’ebé sei mai. Signifika ami hasai ó hosi uma ida-ne’e para sai Prezidente Repúblika ba povu tomak. Entaun, ohin mai fali katak ha’u sai duni prezidente ba povu tomak,” Prezidente Repúblika Lú Olo iha nia diskursu abertura iha diálogu refere entre PR ho populasaun Baucau.

Tanba ne’e, Xefe Estadu agradese ba povu Munisípiu Baucau ne’ebé fó ona konfiansa ba nia hodi sai Prezidente ba povu tomak, entaun iha ninia vizita ida-ne’e nia hakarak rona barak hosi populasaun iha Baucau.

“Duke ha’u mak ko’alia barak liu, di’ak liu ha’u rona barak liuhosi ita-boot sira, kona-ba situasaun sira hotu iha Munisípiu Baucau nian,” nia dehan.

Hateke ba sorin-sorin, Sidade Baucau hetok nakukun be nakukun. Populasaun sira sena malu iha uma tatis ida-nia okos. Labarik sira, iha luron nia klaran, halai ba-mai hodi hariis udan-been. Ai-horis sira liki nia tahan ho ksolok.

Udan-been monu iha Edifísiu Administrasaun Munisípiu Baucau nia leten ne’e, hanesan melodia múzika ksolok ida-nia be halo ema matan dukur. Udan monu rai nafatin. Udan-been bele hapara diálogu ho Prezidente Repúblika ne’e la to’o nia rohan. Populasaun Baucau nia preokupasaun sira, ohin, mout lerek iha udan-been dezembru nian. Udan oh udan..!

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here