Sekretáriu Estadu ba Protesaun Sivíl, Joaquim José Gusmão dos Reis Martins. Imajen TATOLI/Egas Cristovão

DILI, 17 dezembru 2020 (TATOLI)Primeiru-Ministru (PM), Taur Matan Ruak, fó orientasaun ba Sekretáriu Estadu Protesaun Sivíl (SEPS), Joaquim José Gusmão dos Reis Martins hodi prepara kondisaun atu hasoru kondisaun udan boot iha Timor-Leste, kauza hosi La Niña.

“Mai simu orientasaun balun kona-ba preparasaun SEPS atu hasoru difikuldade boot, tanba Timor-Leste sei afeta fenómenu La Niña, ne’ebé udan-tau ho intensidade boot, tanba ne’e Primeiru-Ministru hato’o preokupasaun no husu SEPS nia preparasaun oinsá, karik akontese ita bele responde lalais no di’ak,” Sekretáriu Estadu Joaquim José relata hafoin hasoru Xefe Governu, iha Palásiu Governu.

Tuir Sekretáriu Estadu ne’e, SEPS sempre halo koordenasaun ho ministériu relevante sira, liuliu Ministériu Administrasaun Estatál (MAE), tanba ne’e preparadu atu hasoru, tantu rekursu no fasilidade.

“Daudaun ne’e iha rekursu naton, nune’e mós ekipamentu ba protesaun sivíl nian. Ita preparadu tanba serbisu hamutuk ho instituisaun Estadu no parseiru sira, daudaun SEPS konvoka ona reuniaun ho instituisaun sira hodi halo preparasaun di’ak liután,” Joaquim subliña.

Nia dehan, ho dezastre naturál ne’ebé antes ne’e akontese, halo SEPS aprende liután oinsá atu halo preparasaun di’ak.

La Niña hanesan fenómenu ida ne’ebé halo temperatura iha tasi ibun tun to’o nível 3° to’o 5° hosi normál, iha leste no sentru oseanu pasífiku no ekuadór.

Fenómenu ne’e akontese ho durasaun la liu hodi fulan-lima, ne’ebé afeta ba klima iha rejiaun hotu iha mundu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here