Atividade traballadór iha estrada dirasaun aldeia Raifun ba Ritabou, munisípiu Maliana, segunda (4/12). Imajen TATOLI/António Gonçalves

DILI, 17 dezembru 2020 (TATOLI)Ministériu Obra Públika (MOP) no Kámara Komérsiu no Indústria Timor-Leste (CCI-TL, sigla portugés) iha tempu besik sei asina akordu pra-kualifikasaun empreza iha Timor-Leste, bainhira atu konkorre iha konkursu públiku ba obra Estadu.

Diretór Nasionál Aprovizionamentu MOP, Quintiliano Afonso Belo, hateten daudaun ministériu tutela halo hela esforsu hodi reativa fali sistema pra-kualifikasaun empreza, tuir dekretu-lei númeru 27/2010, 22 dezembru, kona-ba sertifikasaun empreza privadu atubele ezekuta projetu Governu.

“Guia apoia sei bazeia ba lei ne’ebé vigora, fahe klasifikasaun ba rua hanesan empreza konstrusaun sivil no konsultoria téknika, ne’ebé tempu besik ita asina ona akordu,” Diretór Nasionál ne’e informa ba Agência TATOLI, iha ninia knaar fatin, Caicoli, kinta ne’e.

Notísia Relevante: Governu sei aplika ho rigór pra-kualifikasaun empreza konkorre konkursu públiku

Ho baze lejizlasaun, MOP konsege kategoriza empreza sira kuaze 700, ne’ebé husi númeru ne’e prodús ona sertifikadu klasifikasaun ba empreza 697 iha área konstrusaun sivil no empreza konsultoria téknika sivil ne’ebé kobre munisípiu 12 inklui Rejiaun Administrativa Espesiál Oé-cusse Ambeno (RAEOA), maibé daudaun sertifikadu invalidu ona tanba ho durasaun tinan-rua de’it.

Nune’e, Ministru Obra Públika, Salvador Eugênio Soares dos Reis Pires, orienta ona ekipa Diresaun Nasionál Aprovizionamentu (DNA) hamutuk ho Gabinete Ministru atubele re-ativa hikas sistema hodi empreza sira bele halo renovasaun ba sertifikadu invalidu (mate) no emite foun ba empraza sira ne’ebé seidauk iha klasifikaasaun.

Klasifikasaun dahuluk, empreza konstrusaun sivil fahe ba kategoria A hamutuk empreza 59, ne’ebé bele ezekuta projetu ho valór $1.500.000 ba leten, kategoria B1 empreza 89 bele ezekuta projetu ho valór $750.000 to’o $1.500.000.

Kategoria B2 ho empreza 181 ne’ebé bele ezekuta projetu ho valór $250.000 to’o $750.000 no kategoria C hamutuk empreza 284 ne’ebé bele ezekuta projetu ho valór $25.000 to’o $250.000.

Klasifikasaun daruak, empreza sira iha área konsultoria téknika fahe ba kategoria A ho empreza haat ne’ebé bele ezekuta projetu ho valór $1.500.000 ba leten, kategoria B1 empreza rua bele ezekuta ho valór valór $750.000 to’o $1.500.000.

Kategoria B2 ho empreza hitu ne’ebé bele ezekuta valór $250.000 to’o $750.000 no kategoria C laiha.

Empreza konsultoria téknika iha sistema hamutuk 697, husi totál ne’e empreza 626 simu ona sertifikakadu no 71 la konsege hetan sertifikadu tanba la prenxe rekezitu ne’ebé preve iha dekretu-lei 27/2010, 22 dezembru.

“ Loloos atualizasaun hahú fali ona iha janeiru 2020, maibé infelizmente ami labele halo ida-ne’e tanba ita la’o de’it ho osan duodésimu, maibé ami kompromitidu halo manutensaun sistema baze dadus ne’ebé konsege paradu durante tinan barak,” Diretór Nasionál ne’e akresenta.

MOP liuhosi DNA inklui ajénsia sira esforsu nafatin hodi identifika vantajen no dezvantajen sira nune’e empreza sira labele vítima iha kompetisaun.

MOP mós haree hela oinsá fahe klasifikasaun sira tuir atividade negósiu iha sertifikadu ne’ebé Servisu Rejistrasaun no Verifikasaun Emprezariál (SERVE) emite ba empreza no kontratór sira iha área bee-moos no sanitasaun inklui eletrisidade.

“Ami halo daudaun alterasaun balun ba guia apoiu ho baze ba dekretu-lei ein vigór tuir situasaun no realidade atuál ho kolaborasaun másimu husi Kámara Komérsiu no ikus liu sei selebra akordu molok komesa klasifikasaun,” nia hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here