Diretór Institutu Defeza Nasionál Timor-Leste (IDN-TL), Donaciano Costa Gomes "Pedro Klamar Fuik". Imajen Tatoli/Egas Cristóvão

DILI, 17 dezembru 2020 (TATOLI)- Institutu Defeza Nasionál Timor-Leste (IDN-TL) sei fó graduasaun ba xefe suku na’in 442 iha loron 23 dezembru ne’e.

Autoridade suku 442 ne’e hahú halo ona formasaun hosi maiu to’o jullu, tinan ne’e, no konklui tiha ona Kursu Seguransa no Defeza Nasional iha Auditoria IDN-TL, Dili.

Tuir ajenda  graduasaun ne’ebé Agência Tatoli asesu hosi IDN-TL, ohin,  haktuir, serimónia graduasaun ne’e sei hala’o iha Sentru Konvensaun Dili  (CCD) sei kompleta uluk ho formasaun kona-ba simulasaun no koordenasaun ba jestaun krize COVID-19 no simulasaun ba protokolu nasionál no autoridade lokál sira durante  loron rua,  21 to’o 22 dezembru.

Formasaun ba fase daruak ne’e nu’udar formasaun iha nivel elementár iha área Seguransa no Defeza Nasionál hodi haluan koñesimentu autoridade lokál sira nian.

Módulu simulasaun rua-ne’e, tuir programa, xefe suku sira sei simu hosi Diretór IDN-TL rasik, Donaciano Costa Gomes “Pedro Klamar Fuik”.

Iha loron datolu hakat ba serimónia enserramentu ne’ebé IDN sei halo mós entrega sertifikadu, manuál formasaun nian, Kadeli no Uniforme balun ne’ebé IDN prepara hela ba autoridade lokál sira.

“Objetivu prinsipál husi formasaun ba segundu periodu ne’e, atu kapasita di’ak liután xefe suku sira kona-ba oinsá sira bele halo jestaun no koordenasaun ka oinsá atu atua iha situasaun de kalamidade no dezastre naturál,”   Kordenador Kursu Seguransa Defeza Nasional, Nuno Corvelo Sarmento hateten.

Durante formasaun iha primeiru períodu, konsentra liubá iha kestaun teórika no hala’o mós debates kona-ba situasaun ne’ebé iha.

Iha formasaun daruak ba faze elementár ne’ebé la’o loron rua nia laran, bazeia liu ba iha tipu simulasaun, klarifika koordenadór hosi Kursu Seguransa no Defeza Nasionál ne’e.

Fundamentu seluk  husi matéria simulasaun ba jestaun no koordenasaun ba krize ne’e, oinsá autoridade suku sira bele jere no bele koordena sira-nia atividade liu-liu kona-ba dezastre naturál no ikus luta hasoru surtu COVID -19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here