Ministru Administrasaun Estatal (MAE), Miguel Pereira de Carvalho . Imajen/Media MAE.

BAUCAU, 17 dezembru 2020 (TATOLI)—Ministériu Adminitrasaun Estatál (MAE) promete katak sei konstrui uma ba “Kbiit Laek” sira iha Munisípiu Baucau bazea ba Orsamentu Jeráal Estadu (OJE) tinan fiskál 2021 nian ne’ebé hetan ona aprovasaun iha Parlamentu Nasionál (PN).

Notísia Relevante: 2021, Governu sei reabilita sede suku 250 iha TL

Ministru Adminstrasaun Estatál (MAE), Miguel Pereira de Carvalho, hatutan Governu planeia ona katak iha 2021 nia laran ne’e Governu sei konstrui uma ba “Kbiit Laek” sira iha teritóriu Timor-Leste laran tomak maibé prioridade ba Munisípiu Baucau nian ne’e hamutuk 177.

“Kona-ba uma ba ‘Kbiit Laek’ sira, MAE ko’alia ona katak atu halo uma ba kbiit laek sira iha TL tomak ho totál rihun 1.772. Entaun, atu hateten de’it katak iha tinan oin, bazea ba aprovasaun OJE 2021 nian, mak iha Baucau ita sei halo uma ba kbiit laek hamutuk 177, iha postu neen (6) munisípiu Baucau ho total orsamentu besik tokon $3.2,” Miguel Pereira de Carvalho, hateten iha nia intervensaun ba xefe suku sira liuhosi diálogu entre PR Lú Olo ho populasaun Baucau iha resintu Administrasaun Munisípiu Baucau, Baucau Vila Nova, kinta ne’e.

Nia haktuir, uma ba kbiit laek sira-ne’ebé atu konstrui mak nia medida sei la hanesan tanba uma balun iha médida 38 metru kuadradu, 42 metru kuadradu, ne’ebé uma ida-nia folin entre rihun $14 to’o $16 ne’ebé destinadu ba ema kbiit laek sira iha suku hotu-hotu iha TL laran tomak.

Infelizmente, nia dehan, tanba kapasidade osan la to’o mak kada suku ida só halo iha aldeia ida uma tolu de’it, depois tinan tuir mai kontinua no ba aldeia sira seluk. Governante ne’e apela ba lider lokál sira katak ema ne’ebé merese hodi sai benefisiáriu ba uma ne’e mak ema sira-ne’ebé kbiit laek duni, labele familia ka grupu fali mak benifísia, tanba ne’e iha métodu para hodi identifika ema kbiit laek sira.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here