Xefe Suku Bucoli, Teresinha de Jesus dos Reis, simu Prezidente Repúblika ho nia komitiva hodi kahe tais ba PR Lú Olo. Imajen/Mídia PR.

BAUCAU, 16 dezembru 2020 (TATOLI)—Prezidente Repúblika Francisco Guterres Lú Olo, ohin, hamutuk ho Espoza Cidália Mouzinho Lopes Nobre Guterres presta omenajen ba saudozu Komisáriu Polítiku Nasionál FRETILIN, Vicente Reis ‘Sahe’, iha Suku Bucoli, Postu Administrativu Baucau Vila, Munisípiu Baucau.

Iha vizita ne’e, populasaun Suku Bucoli simu Prezidente Repúblika nia komitiva ho entuziasmu ho moradór tradisionál no simu ho lia dadolin orijinál hosi Bucoli nian.

Xefe Suku Bucoli, Teresinha de Jesus dos Reis, simu Prezidente Repúblika ho nia komitiva hodi kahe tais ba PR Lú Olo. Imajen/Mídia PR.

Iha fatin hanesan Xefe Suku Bucoli, Teresinha de Jesus dos Reis, hateten nia sente kontente tanba hetan vizita hosi Prezidente Repúblika Lú Olo hodi relembra fila fali sira-nia erói ne’ebé mate ba rai ida-ne’e iha tempu invazaun Indonézia nian.

“Vizita Prezidente Repúblika nian mai ami-nia Suku Bucoli ne’e, hanoin di’ak tanba PR Lú Olo bele relembra filafali erói ne’ebé luta no liberta ba rai ida-ne’e hodi fó omenajen Komisáriu Polítiku Sahe,” Xefe Suku Bucoli, Teresinha de Jesus dos Reis, hateten bainhira simu komitiva Prezidente Repúblika iha Suku Bucoli, kuarta ne’e.

Teresinha de Jesus dos Reis hateten, Prezidente Repúblika Lú Olo nia vizita ne’e bele haree diretamente ninia povu nia kondisaun moris iha terrenu liliu iha Suku Bucoli ne’e.

Komandante Vicente Reis ‘Sahe” nia restu mortal ne’ebé hatuur hela fatin dignu iha Bucolei. Imajen/Mída PR.

“Ho vizita PR Francisco Guterres ninian, ha’u kontente tanba PR hakarak vizita ne’e hanesan vizita ofisiál ba Munisípiu Baucau nian. Tanba ne’e, ohin ita-nia Prezidente Repúblika liuhosi komandante Vicente Reis ‘Sahe’ nia moris fatin hodi presta omenajen depois hakat ba Baucau Vila,” nia dehan.

Entretantu, Sekretáriu PAS Munisípiu Baucau, José da Silva hatete komunidade rai Bucoli mós halo istória ba ukun rasik-aan, nune’e ohin loron Timor-Leste hetan independénsia.

“Saudozu Sahe nia restu mortál ne’ebé mak rai iha ne’e, durante tinan barak ona. Nune’e PR Francisco Guterres hanesan luta na’in, hodi ohin ita-boot bele mai vizita tanba imi mesak luta na’in.  Maske isin la hasoru-malu maibé esperitu sempre hasoru malu,” nia hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here