Komandante Jerál PNTL, Komisáriu Faustino da Costa. Imajen Tatoli/Eugénio Pereira

DILI, 16 dezembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, hasai ona despaxu ba membru polísia hosi unidade hotu ne’ebé hala’o viajen ba-mai Dili-Oe-Cusee no Atauro tenke selu ka sosa billete hodi kontribui taxa ba Estadu Timor-Leste.

Karta despaixu ne’ebé Komandante Jerál PNTL hasai  relasiona ho informasaun kona-ba membru polísia no komandante balun ne’ebé halo movimentu utiliza ró Berlin Nakroma durante ne’e la sosa tiketi ka billete  hodi sa’e ró gratuita de’it.

Atu evita problema ne’e ba beibeik, iha loron 17 novembru 2020, Komisáriu Faustino da Costa, hasai despaxu sirkulasaun no orientasaun ba membru PNTL sira ne’ebé utiliza transporte marítima tenke kumpre regra sira selu ka sosa billete Ró  Nakroma nian.

Iha karta despaxu ne’ebé Agência Tatoli asesu, haktuir katak, atu hametin no haforsa kooperasaun entre PNTL ho Autoridade Portu Timor-Leste (APORTIL) iha ámbitu utilizasaun transporte koletivu pasajeiru ho ró komersiál maka;

  1. Membru PNTL sira ne’ebé utiliza transporte koletivu pasajeiru ho ró komersiál via Dili-Oe-Cusse no Oe-Cusse-Dili ka Atauro-Dili no Dili-Atauro, atu fó atensaun ba kapasidade karga ró nian nune’e la fó prejuízu ba pasajeiru tuir regulamentu navegasaun nian.
  2. Membru PNTL sira ne’ebé utiliza transporte koletivu pasajeiru ho ró komersiál nian tenke hatudu orden servisu hosi superiór ierarkia PNTL ba autoridade APORTIL antes hala’o viajen no sempre utiliza uniforme.
  3. Membru PNTL sira ne’ebé utiliza transporte koletivu pasajeiru ho ró komersiál nian durante ejerse direitu lisensa ka pasa férias ho família hosi Dili ba Oe-Cusse no Atauro ka Oe-Cusse mai Dili, obrigatoriumanete tenke selu billete, selu bagajen, no selu transporte privadu ne’ebé sira lori no tula iha ró komersiál.

Komisáriu PNTL ne’e husu ba komandante unidade no komandante rejionál, munisipál no xefe servisu sira atu orienta ba membru PNTL  hanesan;

  1. Kumpre sirkulár ida-ne’e ho responsabilidade
  2. Kontrola membru PNTL sira ne’ebé hala’o viajen utiliza transporte koletivu pasajeiru ho ró komersiál
  3. Membru PNTL sira tenke kumpre regulamentu autoridade portuáriu nian.

Komandu PNTL alerta mós ba membru PNTL sira ne’ebé la kumpre despaxu no orientasaun ne’e sei iha konsekuénsia jurídika ba asaun disiplinár  no  despaxu orientasaun ne’e aplika hahú kedas hosi data aprovasaun ba oin.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here