Estudante Ensinu Sekundáriu Jerál Númeru 01 Baucau forma iha resintu eskola nian atu simu Prezidente Repúblika ho nia komitiva atu ba vizita sira-nia eskola. Imajen TATOLI/Osória Marques.

BAUCAU, 16 dezembru 2020 (TATOLI)—Diretór Ensinu Sekundáriu Jerál (ESJ) Númeru 01 Baucau, Paulo dias Menezes, sente haksolok tebes tanba ho prezensa Prezidente Repúblika, Francisco Guterres Lú Olo, no membru VIII Governu sira mai vizita eskola ne’ebé nia lidera hodi bele haree direta kondisaun no difikuldade sira-ne’ebé eskola ne’e enfrenta.

Diretór ne’e hatutan, iha oportunidade ne’e nia mós relata kondisaun eskola refere ne’ebé iha kondisaun aat no grave ne’e ba Prezidente Repúblika no ministériu relevante inklui informa diretamente kondisaun sala-de-aula ne’ebé limitadu, hodi akumula estudante na’in-55-60 iha kada sala-de-aula ida-nia laran.

Diretór Ensinu Sekundáriu Jerál Númeru 01 Baucau, Paulo dias Menezes. Imajen TATOLI/Osória Marques.

“Ami hosi Ensinu Sekundária Jeral Númeru 01 Baucau ida-ne’e, ami haksolok no privilejiu tanba Prezidente Repúblika Francisco Guterres Lú Olo no membru Governu sira, ne’ebé ohin marka prezensa mai halo vizita hodi haree ami-nia edifísiu diretamente ami-nia Eskola nia kondisaun ne’ebé aat. Ami-nia sala-de-aula hamutuk 13. Tinan ba tinan estudante sira-ne’e númeru aumenta barak tanba eskola ida-ne’e harii kedas iha sentru. Iha 2020 ne’e, totál estudante sira hamutuk na’in-1.834. Hosi númeru ne’e, ami akumula estudante na’in-55-60 iha sala-de-aula ida-nia laran hodi tuir prosesu aprendizajen”, Diretór Ensinu Sekundáriu Jerál Númeru 01 Baucau, Paulo dias Menezes, ba jornalista sira iha Ensinu Sekundáriu Jerál Númeru 01 Tirilolo, Baucau, kuarta ne’e.

Tanba ne’e, nia dehan, solusaun ikus mak rezidénsia ofisiál ba profesór/a hanesan uluk ne’e, tenke baku fera tiha mak utiliza hotu ba sala-de-aula atu hala’o prosesu aprendizajen iha laran. Kona-ba laboratóriu, nia dehan, laboratóriu uluk nian mós estragu totál tanba uma nia kakuluk sira dodook no monu namtati maibé sei bele utiliza to’o ohin loron.

Entretantu, estudante Ensinu Sekundáriu Númeru 01 Baucau, Joãozinho Lee, hateten nia parte sente haksolok tanba maske sira-nia kondisaun eskola ne’ebé mak la di’ak maibé Prezidente Repúblika Francisco Guterres Lú Olo hakat mai Baucau hodi vizita sira-nia eskola refere.

“Ha’u kontente tebes tanba Na’in Prezidente Repúblika, Francisco Guterres Lú Olo, mai vizita ami-nia eskola ne’ebé ho kondisaun aat grave,” Joãozinho Lee hateten.

Estudante ne’e mós preokupa ho kondisaun sala aula tanba sala ida tenke akumula ema 50-60 tanba ne’e ho Prezidente Repúblika hamutuk ho membru VIII Governu konstitusionál sira-nia vizita mai haree ho matan mondisaun eskola ne’e, hodi nune’e bele halo planu ida hodi responde ba kondisaun eskola ne’ebé aat no grave.

Jornalista: Osória Marques 

Editór: Cancio Ximenes

HAKEREK NO HATÁN

Please enter your comment!
Please enter your name here