Imajen/Media PN.

DILI, 15 dezembru 2020 (TATOLI)—Parlamentu Nasionál (PN) sei diskute proposta-rezolusaun konvensaun Nova Iorke kona-ba rekoñesementu no sentensa abritrál estranjeiru tanba Governu konsidera konvensaun ne’e importante ba Timor-Leste.

Proposta-rezolusaun ne’e mai hosi Governu no aprezenta ba Parlamentu Nasionál atu konsidera iha ajenda diskusaun.

Prezidente Parlamentu Nasionál Ein-Ezersísiu atuál Vise-Prezidente Parlamentu Nasionál, Deputada Maria Angelina Lopes Sarmento, tersa ne’e, baixa proposta-rezolusaun númeru 3/V(2a)-adezaun Timor-Leste nian ba Konvensaun Nova Iorke kona-ba rekoñesementu no ezekusaun sentensa abritrál estranjeira ba Komisaun A (Justisa no Konstitusionál) no Komisaun B (Negósiu Estranjeiru, Defeza no Seguransa).

“Ami konvida Prezidente Komisaun A no Prezidente Komisaun B hakat mai leten para meza baixa kona-ba adezaun Timor-Leste ba konvensaun Nova Iorke kona-ba rekoñesementu no ezekusaun sentensa abritrál estranjeira,” Deputada Maria Angelina Lopes Sarmento, informa liuhosi plenária hodi baixa projetu-rezolusaun ne’e ba Komisaun A no Komisaun B.

Prezidente Komisaun A, Deputadu Joaquim dos Santos, esplika projetu-rezolusaun ne’e Governu husu ba Parlamentu Nasionál atu aprova rezolusaun ida nune’e admite Timor-Leste adere kovensaun Nova Iorke kona-ba rekoñesimentu no ezekusaun sentensa abritrál estranjeira.

“Komisaun A no B sei sei reune hodi halo ajenda, ha’u seidauk bele informa ba públiku kona-ba substánsia rezolusaun kona-ba arbitrajen internasionál komersiál ne’ebé ita hakarak hola-parte iha konvensaun Nova Iorke ne’e. Komisaun sei aprezenta paresér ida ba parlamentu para nune’e parlamentu bele aprova,” nia esplika.

Nia dehan, subtánsia hosi projetu rezolusaun ne’e sei aprezenta ba plenária atu-bele halo diskusaun iha plenária.

“Tuir proposta-rezolusaun hosi Governu nian dehan importante maibé komisaun A sei haree aspeitu legál tanba matéria ne’e kompeténsia eskluzivu Komisaun B nian mas ami sei haree hamutuk,” fundamenta Prezidente Komisaun A.

Konvensaun rekoñesementu no ezekusaun sentensa abritrál estranjeira ne’e selebrada iha Nova Iorke, iha loron 10 juñu 1985.  Iha konvensaun vigora ho versaun inglés, xinés, españa, francês no Rússia ne’ebé sai ona arkivu Organizasaun Nasaun Unida (ONU) nian.

Ezisténsia hosi konvensaun ne’e atu regula dispozisaun legál hotu-hotu tanba konvensaun ne’e mportante liu iha sosiedade no asegura protesaun legál ba parte sira-ne’ebé iha relasaun jurídika, inklui relasaun jurídika domíniu iha atividade ekonómika.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here