Ministru Obra Públika, Salvador Eugênio Soares dos Reis Pires, halo diskursu abertura iha semináriu ne’ebé realiza iha Otél Novo Turismo, tersa (15/12). Imajen TATOLI/Florêncio Miranda Ximenes

DILI, 15 dezembru 2020 (TATOLI)-–Governu liuhosi Diresaun Jerál Abitasaun no Urbanizmu realiza semináriu hodi divulga informasaun kona-ba abitasaun no urbanizasaun ba autoridade lokál iha munisípiu Dili no akadémiku sira.

Semináriu ne’e ho tema ‘futuru sidade Dili, dezafiu no solusaun sira iha kontestu dezenvolvimentu sustentável’.

“Ami halo semináriu ho intensaun fahe informasaun kona-ba polítika no planu Governu, liuliu liga ho planu abitasaun no urbanizasaun ne’ebé haree ba problema estruturál no dezafiu sira atu apoia Governu atinje dezenvolvimentu urbanu sustentável,” Ministru Obra Públika, Salvador Eugênio Soares dos Reis Pires, afirma hafoin abertura semináriu iha Otél Novo Turismo, Lecidere, Dili, tersa ne’e.

Tuir Ministru, razaun envolve autoridade lokál, xefe suku sira no akadémiku iha munisípiu Dili atu diskute dezafiu no solusaun ba implementasaun polítika abilitasaun no urbanizasaun.

“Ita envolve entidade hirak ne’e atu haree problema estruturál ba planu sidade Dili hodi suporta idea hodi apoia Governu atinje objetivu,” nia akresenta.

Nune’e, governante ne’e espera liuhosi atividade ne’e bele hetan rekomendasaun balun ne’ebé bele kontribui ba Governu liuliu Ministériu Obra Públika (MOP).

VIII Governu Konstitusionál kria ona ezbosu tolu kona-ba Planu Urbanu hanesan ne’ebé kompostu hosi Lei Jestaun Territoriál, Klasifikasaun Uzu Solu no Urbanizasaun inklui Edifikasaun Urbanu ho baze iha dekretu-lei númeru 6/2017, loron 19 abríl.

“Ita estabelese lei tolu ne’e atu deriva filafali prosedimentu sira atubele implementa planu territoriál no urbanizmu bainhira hetan aprovasaun,” nia esplika.

Hafoin mudansa lei orgánika Governu, MOP entrega esbosu dekretu-lei tolu kona-ba planu urbanu ba Vise Primeiru-Ministru no Ministru Planu no Ordenamentu, José Maria dos Reis atu haree ninia kontiúdu atu kontinua avansa ba diskusaun no aprovasaun iha Konsellu Ministru.

Rezultadu progresu servisu MOP iha tinan-2019 iha área abitasaun no planeamentu urbanu maka hanesan programa atu harii uma iha sidade Dili, estudu pre-viabilidade no identifikasaun sítiu ne’ebé tama ona faze negosiasaun ho parseiru internasionál hanesan International Finance Corporation (IFC) no parseiru dezenvolvimentu sira atu dezenvolve estudu no dezeñu ho modalidade Parseiia Públiku Privadu (PPP).

Aleinde ne’e, MOP hahú Estabelese enkuadramentu legál sira inklui planeamentu urbanu ba sidade Dili no munisípiu hodi promove lei tolu ne’e.

Ministériu selebra ona akordu ho parseiru dezenvolvimentu hanesan Organizasaun Nasaun Unida (ONU) ba asuntu abitasaun hodi apoiu harii planeamentu territoriál ba sidade Dili no prosedimentu kontrolu dezenvolvimentu fíziku inklui lansa ona konkursu ba estudu revitalizasaun polu dezenvolvimentu ba Batugade no munisípiu seluk.

MOP mós hala’o ona revizaun kustu unitáriu ba konstrusaun Eskola Vokasionál Politékniku no Akademia Peska iha Betano, Manatuto no Lautém no estudu planu mestre ba Hospital Nacional Guido Valadares (HNGV), Ospitál Lahane no Sidade Universitáriu iha munisípiu Aileu.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here