Ekipa hosi Embaixada Kuba iha Timor-Leste no SEKoop halo enkontru ko’alia kona-ba kooperasaun kooperativa iha edifísiu Akait, tersa (15/12). Imajen/MÍdia-SEKoop

DILI, 15 dezembru 2020 (TATOLI)—Embaixadór Kuba iha Timor-Leste, Omar L Morrero Betancour, hamutuk ho ekipa, hasoru malu ho Sekretáriu Estadu Kooperativa, Elizário Ferreira, hodi ko’alia kona-ba kooperasaun entre nasaun rua iha área kooperativa.

“Ami ko’alia ho Sekretáriu Estadu Kooperativa atu haree oinsá dezenvolve setór kooperativa haat hanesan agro-pekuária, peska, teknolojia no transporte públika, tanba ne’e parte Kuba sei tau prioridade ba kestaun ne’e,” Embaixadór Omar  hateten hafoin enkontru iha edifísiu Akait, tersa ne’e.

Iha fatin hanesan, Sekretáriu Estadu Elizário esplika, objetivu prinsipál hosi enkontru ne’ebé realiza entre  SEKoop ho Embaixadór Kuba maka atu projeta kooperasaun entre parte.

“Governu kubanu aprezenta hanoin haat hanesan baze ne’ebé kooperativa bele toma atensaun, hanesan dezenvolvimentu kooperativa,” nia akresenta.

Tuir governante ne’e,  kooperativa nia atividade maka atu hakiak animál hanesan manu, karau, kuda ho seluk tan, haree ba turizmu, peska, no ikus liu maka ba kooperativa teknolojia no transporte públika.

“Tanba ne’e sira dehan ita bele koopera, hili programa sira ne’e hotu di’ak liu tan. Se hili balun mós kabe ba kompeténsia ne’ebé mak iha tanba iha Timór dezenvolvimentu kooperativa ne’ebé la’o barak liu iha área finanseira,” nia hatutan.

Kooperasaun entre nasaun rua ne’e sei haree atu promove dezenvolvimentu kooperativa produsaun hodi eleva kapasidade timor-oan haburas atividade kooperativa hodi kontribui ba produsaun rai-laran, hasa’e kampu traballu, no redúz kiak hodi kontribui ba seguransa alimentár iha Timor-Leste.

“Kooperasaun ne’e la ko’alia kona-ba osan, maibé oinsá mak atu koopera atu aproveita ema-nia matenek, dezenvolvimentu no kapasidade atu ema bele mai suporta no eduka ita. Osan ne’e parte ida maibé ita ko’alia oinsá bele realiza, la’ós de’it benefisia ema ne’ebé apoia maibé ita mós bele investe atubele aselera área produsaun,” Elizário haktuir.

Sekretáriu Estadu ne’e nota katak área produsaun fásil atu temi maibé susar iha implementasaun, tanba ne’e nia konsidera presiza serbisu maka’as no labele depende ba ema.

“Apoiu sira tenke jere ho di’ak hodi asegura sustentabilidade iha futuru,” nia fó hanoin.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here