Ministru Obra Públika, Salvador Eugênio Soares dos Reis Pires. Imajen TATOLI/Egas Cristovão

DILI, 15 dezembru 2020 (TATOLI)—Governu liuhosi Konsellu Administrasaun Fundu Infraestutura (CAFI, sigla portugés) aprova ona programa revitalizasaun no abitasaun komunitária atu harii uma ho unidade 2.000 iha sidade Dili.

Programa ne’e, Ministériu Obra Públika (MOP) iha tinan-2019 halo ona estudu pre-viabilidade no finaliza ona identifikasaun sítiu kompletu, ne’ebé tama faze negosiasaun ho parseiru internasionál hanesan International Finance Corporation (IFC) no parseiru dezenvolvimentu sira atu dezenvolve estudu no dezeñu ho modalidade Parseiru Públiku Privadu (PPP).

“CAFI aprova ona programa revitalizasaun ne’ebé ami finaliza ona estudu iha 2019 no halo ona konkursu halo estudu viabilidade no dezeñu modalidade uma inklui finansiamentu hodi konstrui uma unidade 2.000,” Ministru Obra Públiku, Salvador Eugênio Soares dos Reis Pires, hateten iha Otél Novo Turismo, Lecidere, tersa ne’e.

Hafoin aprovasaun iha CAFI, MOP, Ministériu Finansa no Ministériu Planu no Ordenamentu iha fulan-18 sei halo preparasaun.

Iha parte seluk, MOP no Ministériu Justisa liberta área tolu hanesan Comoro, Kulau-Becora no Hera atu sai fatin ba abitasaun komunitária iha rai ektare 31,4 ho alvu kontrui uma 2.000 to’o 4.000.

“Iha inísiu planeia harii uma unidade 4.000, maibé rai ne’ebé ami hetan la to’o no área Kulau-Becora Governu foti fali atu halo sentru desportivu ba joven sira, entaun ita deminui tuir rai ninia luan, tanba ne’e halo uluk uma unidade 2.000,” nia akresenta.

Kona-ba totál orsamentu no loron implementasaun, governante ne’e informa, hafoin estudu viabilidade no dezeñu detalladu finaliza mak iha kálkulu orsamentu no tinan implementasaun programa revitalizasaun ne’e.

Programa abitasaun ne’e ba klase tolu hanesan ba kbiit la’ek, rendimentu ki’ik, média no mós altu.

Programa VIII Governu Konstitusionál fó prioridade ba revitalizasaun no abitasaun komunitária tanba ho vizaun atu atu asegura povu asesu ba rai no uma ne’ebé mak dignu no asesu ba infraestrutura báziku sira hanesan bee-moos, eletrisidade no saneamentu.

Jornalista: Florêncio Miranda Ximenes

Editora: Julia Chatarina

1 KOMENTÁRIU

  1. Programa neebe furak, liu2 ba kbiit laek sira neebe laiha aksesu atu hola rai no halo uma.
    Uma unidade 4000 neebe sei halo uluk 2000 resoavel duni ho kondisaun sidadaun Timor oan gl ?
    iha kontinuasaun ba munisipiu sira seluk gl lae ?tmba kondisaun Timor sei iha risku ida pobreza.
    Se nukaju programa ne halao iha Dili (Hera) deit oinsa governu nia plano tuir mai hodi hatan povu balun neebe iha distrito seluk neebe dala ruma mos laiha rai no iha capital finasairu neebe minimu atu hatutan buat diak iha nia moris.

HAKEREK NO HATÁN

Please enter your comment!
Please enter your name here