Ministru Finansa, Rui Augusto Gomes. Imajen TATOLI/António Gonçalves

DILI, 14 dezembru 2020 (TATOLI)–Ministru Finansa, Rui Augusto Gomes, hateten ho aprovasaun Orsamentu Jerál Estadu (OJE) 2021 hatudu liután Governu iha marjen hodi hahú rekupera ekonomia.

“Ha’u mai hasoru malu ho Primeiru-Ministu ne’e nu’udar reuniaun semanál, ami ko’alia kona-ba saida mak akontese iha parlamentu nasionál iha loron hirak liubá katak ita-nia Orsamentu Jerál Estadu 2021 pasa ona ho votu favorável 44. Ida ne’e buat di’ak tebes tanba bele inspira konfiansa hosi setór privadu, ajente ekonómiku, sosiedade inklui Governu bele iha marjen atu komesa rekupera ekonomia ba oin,” Ministru Rui Gomes relata hafoin ramata reuniaun semanál ho Primeiru-Ministru, Taur Matan Ruak, iha Palásiu Governu, segunda ne’e.

Orsamentu 2021 ho montante biliaun $1,895 ne’ebé Parlamentu Nasionál (PN) aprova, foti hosi reseita fundu minarai biliaun $1,377 no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Iha planu asaun anuál Governu ba tinan oin, reflete kontinuasaun traballu reforma jestaun finansa públika, ne’ebé inisia susesivu Governu liuhosi roteiru orsamentasaun kada programa.

Tinan fiskál 2021 hanesan tinan finanseiru dahuluk ba departamentu, institutu no entidade públika sira iha Governu implementa orsamentu ba kada programa.

Bazeia livru 2 (planu anuál) deskreve iha OJE 2021 integra programa hamutuk 141, sub-programa 431 no totál atividade hamutuk 1.837.

Kuadru planeamentu kona-ba orsamentasaun kada programa bazea ba Planu Estratégiku Dezenvolvimentu (PED) 2011-2030 no Objetivu Dezenvolvimentu Sustentável (ODS) 2030, hanesan dokumentu estratéjiku no dokumentu polítiku.

Prioridade lima ba tinan 2021 mak hanesan bein-estar sosiál, protesaun sosiál no sidadania ho despeza $645.180.926 (35,9%), investe iha ekonomia no finansa públika hamutuk $374.622.063 (20,8%), mellora konetividade nasionál $546.181.052 (30,4%), konsolida no fortalese defeza, seguransa no relasaun esterna $158.830.873 (8,8%), konsolida no fortalese justisa, demokrasia no direitu umanu $72.428.398 (4%).

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here