FFTL halo sorumutuk ho ekipa feminina haat ne'ebé atu kompete ih Tasa Rosa "Muki" Bonaparte . Imajen Tatoli/Hortencio Sanches

DILI, 14 dezembru 2020 (TATOLI) – Federasaun Futeból Timor-Leste (FFTL) sei realiza tasa Rosa “Muki” Bonaparte iha tempu besik hodi fó oportunidade ba ekipa feminina haat ne’ebé hetan pontu boot iha liga feto Timor-Leste, foin lalais ne’e.

Koordenadór jerál ba tasa Rosa “Muki” Bonaparte, Nonato Soares hateten, tasa ne’e oráriu FFTL prepara ona hein de’it atu realiza.

“Tasa ne’e so klube  haat de’it mak partisipa tanba sira hanesan finalista hosi liga feto Timor-Leste. Ekipa ne’e mak hanesan Buibere FC, Maranatha, S’Amusher FC no AD-SLB Laulara,” dehan Nonato hateten ba Agência Tatoli, ohin, iha edifísiu FFTL, Bairru Formosa, Dili.

Jogu ba tasa refere sei halo iha 17-20 dezembru 2020 iha Estádiu Munisipál Dili. Hosi jogu ne’e se mak manan hakat kedan ba finál no se mak lakon sei iha oportunidade hodi joga buka terseiru lugar tanba prémiu ba kampiaun sira hahú hosi primeiru lugar to’o de’it terseiru lugar.

Atu fó hanoin fali antes ne’e FFTL realize ona LFTL hodi fó oportunidade ba feto sira no ikus mai ekipa Buibere mak sai hanesan kampiaun ba liga ne’e iha semana kotuk.

Maranatha preparadu kontra Buibere

Treinadór ekipa feminina Maranatha FC, José Fernandito. Imajen Tatoli/Hortencio Sanches

Treinadór ekipa feminina Maranatha FC, José Fernandito hateten, maski iha Liga Feto Timor-Leste sira la konsege manan ekipa Buibere hodi sai hanesan kampiaun, maibé iha tasa Rosa “Muki” Bonaparte sei esforsu oinsá bele manan ekipa Buibere.

“Iha liga ami la konsege hetan títulu hanesan kampiaun ba liga, maibé ami hanesan de’it segundu lugar, maibé iha jogu tasa Rosa “Muki” Bonaparte ami na’in rua mak sei hasoru malu ha’u sei esforsu oinsá para ami bele manan,” dehan treinadór ne’e .

Nia dehan, hanesan treinadór hatene ona oinsá kona-ba Buibere nia jogu tanba hasoru malu ona iha liga dala ida.

Iha fatin hanesan treinadór Buibere, Octaviano Nascimento relata, ekipa Maranatha hanesan ekipa ne’ebé todan tebes, maibé sei halo esforsu oinsá para manan.

“Maranatha ami joga dala ida ona ho sira, maibé ami empata 2-2, maibé ha’u konsidera sira ekipa ne’ebé forte,” treinadór Buibere hateten.

Iha tasa Rosa “Muki” Bonaparte ekipa rua hanesan Buibere no Maranatha mak sei joga abertura iha Estádiu Munisipál Dili iha loron 16 dezembru mai ne’e.

Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here