Seremónia Judisium ba dala XIV, ba finalista Fakuldade Saúde Públika hamutuk 236, iha salaun UNPAZ, Manleuana, sábadu (12/12). Imajen/UNPAZ

DILI, 12 dezembru 2020 (TATOLI)Univercidade da Paz (UNPAZ) realiza seremónia Judisium ba dala XIV, ba finalista Fakuldade Saúde Públika hamutuk 236, kompostu hosi feto 164 no mane 72, ho tema ’Haforsa Rekursu Umanu hodi Prevene COVID-19 ho nia Implikasaun iha Timor-Leste’.

Magnífiku Reitór UNPAZ, Adolmando Soares Amaral, enkoraja finalista sira bainhira sai ona antigu alunu labele lakon morál no kontribui ba dezenvolvimentu nasionál.

“Hanesan Reitór hakarak hato’o ba kolega sira katak ita hanesan hanesan família no antigu alunu foun, labele lakon ita-nia morál, labele sai antigu alunu ne’ebé laiha responsabilidade tanba de’it ita-nia interese individuál ou interese grupu kiik ne’ebé aproveita ita,” Reitór apela ba finalista sira liuhosi ninia diskursu iha seremónia Judisium, sábadu ne’e, iha salaun UNPAZ, Manleuana.

Nia hameno ba antigu alunu sira hotu atu afirma nafatin pozisaun no tenke iha prinsípiu atu lebele tuir ema sira ne’ebé iha interese atu aproveita.

“Iha tinan-haat nia laran, dezafiu lubuk ne’ebé estudante no inan-aman sira enfrenta inklui Dekanu sira maka atu fahe matenek. Maibé ohin Fakuldade Saúde Públika ho departamentu neen ho korpu dosente, entrega hikas ita-bo’ot sira filafali ba universidade, ho nune’e universidade sei organiza graduasaun tuir kalendáriu akadémika ne’ebé sei realiza iha loron 19 no 21 dezembru 2020,” Reitór ne’e informa.

Iha diskursu, Reitór UNPAZ relata katak universidade privadu ne’e gradua ona ema na’in-11.000 resin no hosi númeru ne’e, 78% maka asesu ona ba kampu traballu enkuantu 22% seluk kria rasik asosiasaun, atividade, organizasaun ne’ebé agora la’o hela.

“Lalika hakfodak ba ema-nia krítika, tanba laiha indikadór ida atu sukat ita-nia kualidade, ita hotu sei asesu kampu traballu,” nia hatutan.

Biban ne’e, Adolmando Soares sente kontente tamba família boot antigu alunu UNPAZ aumenta tan, sura ho finalista na’in 236 ne’ebé Judisium.

“Ha’u espera loron ruma ita-bo’ot sira sei mai hamriik fali iha ne’e, ho kapasidade hanesan antigu alunu atu ko’alia fali ba ita-nia alin sira iha tempu sira tuir mai,” nia tenik.

Iha fatin hanesan, Dekanu Fakuldade Saúde Públika, Martinus Nahak Lino, hateten situasaun agora iha ámbitu COVID-19 hanesan problema saúde públika ne’ebé ninia implikasaun hotu ba iha ekonomia, sosiedade no ba progresu dezenvolvimentu nasionál rasik.

“Ida-ne’e hanesan parte desafiu boot ida ne’ebé nasaun hasoru, tanba ne’e maka saúde públika nafatin fó fiar ba antigu alunu lisensiadu saúde públika sira hotu atubele kontribui ba ita-nia problema nasaun,” nia apela.

Martinus Nahak konsidera, Fakuldade Saúde Públika hamriik iha universidade privadu ne’e hanesan baze fundamentál ba nasaun hodi hatan ba programa saúde iha Timor-Leste.

Reprezentante inan-aman, Domingos de Carvalho, agradese ba jerente universitáriu ninia kontribuisaun no esforsu tomak durante tinan-haat.

“Ami inan-aman agradese ba Reitór no Dekanu  ho ninia estrutura, ba kontribuisaun no esforsu tomak durante tinan-haat, ne’ebé ohin loron ami-nia oan sira bele simu ona Judisium, ami  husu  deskulpa karik durante ne’e ami-nia oan sira halo buat ruma naksalak, maibé espera katak matenek hotu sei kontinua ba sira,” nia dehan.

Nune’e mós, reprezentante finalista, Sergio Soares Amaral, agradese ba instituisaun akadémiku UNPAZ, ne’ebé sai ona fatin hodi hakle’an koñesimentu siénsia saúde públika no marka istória ba vida akadémiku iha tinan naruk nia laran.

Jornalista: Nelia Fernandes

Editora: Julia Chatarina

HAKEREK NO HATÁN

Please enter your comment!
Please enter your name here