Ró Haksolok. Imajen/Dok. ZEESM

DILI, 11 dezembru (TATOLI)—Deputadu Partidu Demokrátiku (PD), Mariano Assanami Sabino, preokupa proposta millaun $14 ne’ebé prevee finaliza Ró Haksolok tanba ne’e husu esplikasaun hosi Primeiru-Ministru, Taur Matan Ruak.

Assanami hato’o preokupasaun ne’e relasiona ho livru 3C (RAEOA-ZEESM) ne’ebé prevee rúbrika Fundu Espesiál Dezenvolvimentu (FED) ho montante $14,000,000.00 ba ezekuta hodi finaliza konstrusaun Ró Haksolok.

Entretantu poposta orsamentu 2021 hosi RAEOA-ZEESM hamutuk $127,000,000 ne’ebé koloka ba saláriu vensimentu $11.072.049,00, bens servisu $23.775.569,00, kapital minór $2.360.470,00, kapitál dezenvolvimentu $85.506.102,00 no transferénsia públika $4.285.810,00.

“Prinsípiu PD nian mak la fó sala sé-sé mak asina, ne’e prosesu ketak ida. Maibé husu esplikasaun Primeiru-Ministru nian para ita hatene hodi ita bele aprova,” Assanami informa liuhosi plenária Parlamentu Nasionál iha debate espesialidade, sesta ne’e.

Assanami husu atu haree problema ró haksolok ne’e hanesan estadu tanba kompañia ida atu sosa ró ba estadu Timor-Leste.

“Sasán ne’e seidauk fó mai ita, ami la haree dehan ita fó sala malu ne’e, ida-ne’e mak asina, ida-ne’eba mak selu. Ne’e problema ketak. Maibé problema mak ne’e nu’udar Estadu no nu’udar governante katak kompañia ida ita sosa ninia sasán hodi nia lori mai, tenke iha esplikasaun katak ita tau osan ne’e adisionál ka oinsá, dívia ita sosa ró rua, ita inaugura tiha ona, ró la mai,” nia dehan. 

Tuir nia, kompañia ida labele halimar estadu Timor-Leste tanba ne’e estadu Timor-Leste labele halo tuir de’it kompañia nia hakarak.

“Ita iha Estadu no ita iha governante maibé ita-nia nehan ne’e laiha,” hateten Depuatadu Mariano Assanami Sabino.

Purtantu Xefe Bankada KHUNTO, Deputadu Olinda Guterres, pontu fó votu favorável ba orsamentu millaun $14 maibé ró refere tenke mai Timor-Leste.

“Ami [KHUNTO] na’in-lima prontu fó votu a-favór ba RAEOA nian maibé ró ne’e tenke mai Timor. Kuandu la mai ami partidu KHUNTO la responsabiliza,” Xefe Bankada KHUNTO ne’e hateten.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here