Diretór Jerál STAE, Acilino Manuel Branco. Imajen/Espesiál

DILI, 10 dezembru 2020 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten objetivu hosi realiza retiru anuál ne’e atu habiit espíritu servisu ekipa hodi hasa’e kualidade atendimentu ba públiku.

“Ita-nia retiru ohin, ita halibur membru STAE sira hosi Munisípiu 12 inklui Rejiaun Administrativa Espesiál Oé-Cusse Ambeno (RAEOA) no ita konvida mós Komisaun Nasionál Eleisaun (CNE-sigla portugés) ho objetivu atu deseja ita-nia esperansa tomak no mós aprezenta dezafiu hotu. Atu nune’e, ba oin buat ne’ebé mak ita hanoin katak di’ak ona bele kontinua halo di’ak liután no ida ne’ebé mak seidauk di’ak, ita bele hadi’a iha tinan oin,” Alcilino Manuel Branco hateten ba jornalista sira iha salaun Suai Room iha Timor Plaza, Dili, kinta ne’e.

Nia hatutan, durante sistuasaun COVID-19 nia-laran limita tebes ba kualker atividade ne’ebé sira halo sempre iha dezafiu maibé STAE nia ezisténsia ultrapasa dezafiu ho susesu.

“Ita-nia susesu barak ne’ebé ita atinje iha tinan ida-ne’e mak ita halo resensiamentu eleitorál, ita promove edukasaun eleitorál ba ita-nia sidadaun sira. Tanba ne’e, hein katak tinan oin STAE bele goja ona ninia autonómia administrativu finanseiru rasik, tanba tinan sira ba kotuk ne’e STAE seidauk goja ninia direitu. Nune’e maka kona-ba dezafiu espíritu funsionáriu sira kaer metin prisípiu sira ne’ebé mak iha atu garante katak liuhosi dezafiu bele halo dezenvolvimentu ne’ebé di’ak liután,” Acilino dehan.

Tanba ne’e, nia dehan, difikuldade ka fallansu balu ne’ebé mak sira hasoru agora, presiza mellora iha tinan oin mai tanba hatene katak iha tinan oin ne’e nu’udar tinan ne’ebé preparativu atu hasoru eleisaun jerál liuliu eleisaun Prezidente Repúblika nian.

“Iha tinan ne’e mós ita konklui ita-nia planu estratéjiku ba tinan-lima ninian. Entaun momentu ida-ne’e ita mós sei halo aprezentasaun ida ba ita-nia estrutura tomak inklui ho munisípiu hotu atu nune’e bainhira ramata retiru ne’e fila-fali ba munisípiu ida-idak karik, iha ona vizaun no objetivu sira ne’ebé mak klaru, define ita-nia planu estratéjiku sira atu nune’e ita bele dezempeña di’ak liután,” nia subliña.

Nia afirma, estrutura tomak atu dezempeña di’ak ne’e funsionáriu ida-idak nia funsaun tantu pesoálmente ka organizalmente hanesan orgaun eleitorál ida ne’ebé sempre la’o hamutuk ho CNE, atu nune’e bele introdús ka prodús aktu eleitorál sira ne’ebé maka sei implementa iha futuru ho kualidade liu.

Iha biban ne’e, nia apela ba nia membru STAE hotu katak nu’udar funsionáriu públiku tenke kuda metin espíritu profisionalizmu no prinsípiu imparsialidade hodi garante no promove imparsialidade.

“Ha’u-nia orientasaun ba funsionáriu katak sira katak hanesan funsionáriu públiku tenke kuda espíritu profisionalizmu liuliu hanesan funsionáriu STAE ninian, tenke kaer prinsípiu imparsialidade hodi garante tranparante no promove imparsialidade nune’e akta entrada sira ne’ebé ita prodús bele hetan di’ak,” nia informa.

Jornalista: Osória Marques

Editór: Cancio Ximenes

 

HAKEREK NO HATÁN

Please enter your comment!
Please enter your name here