Motór ne’ebé suspeitu-sira “lori subar”. Imajen/PNTL

DILI, 10 dezembru 2020 (TATOLI)-Komandu Polísia Munisípiu Dili servisu hamutuk ho Servisu Investigasaun Kriminál (SIC), ohin, detein suspeitu na’in-tolu ne’ebé envolve iha kazu “lori subar” motór komunidade balun nian iha kapitál Dili.

Motór ida ne’ebé polísia foti hosi suspeitu-sira. Imajen/PNTL

Suspeitu na’in-tolu ho inisiál JDX, JDCP no GDA ne’e, SIC no Servisu Informasaun Polísia (SIP) detein no halo apreensaun ba motór Mio Beat haat ne’ebé suspeitu uza la’o pasiar iha área Don Aleixo-Dili.

Segundu Komandante PNTL, Superintendente Euclides Belo, deklara suspeitu-sira ne’e PNTL buka kleur ona, tanba parte vítima sira halo keixa mai polísia tanba sira-nia motór lakon.

“Operasaun ne’e PNTL Dili halo ba motór komunidade nian ne’ebé lakon konsege hetan iha área Don Aleixo-Dili nian. Suspeitu sira entrega ona ba parte investigasaun hodi halo prosesu identifikasaun,” Euclides Belo hateten ba jornalista iha Komandu PNTL, Caicoli, Dili.

Motór haat ne’ebé PNTL halo apreensaun hosi suspeitu sira ninia dokumentu la iha no parte PNTL sei halo identifikasaun ba motór hirak ne’e nia xapa matrikula no númeru serial body no mákina.

Superintendente Euclides Belo husu ba komunidade-sira ne’ebé motór lakon atu hakbesik ba parte PNTL lori ho dokumentu kompletu hodi PNTL halo identifikasaun no halo termu entrega ba motór na’in.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here