Imajen TATOLI/Natalino Costa.

DILI, 09 2020 (TATOLI)—Sekretáriu Estadu Kooperativa (SECoop, sigla portugés) sei kapasita rekursu umanu hodi oferese formasaun ba dirijente koperativa kréditu sira, nune’e bele halo jestaun ne’ebé di’ak iha futuru.

Sekretáriu Estadu Kooperativa, Elizário Ferreira, hateten relasiona ho komemorasaun loron nasionál ba Kooperativa Kreditu (KK) ba dala-11 ne’ebé sei hala’o iha 10 dezembru ne’e, SECoop sei fó formasaun bazea ba proposta hosi dirijente kooperativa kréditu sira.

“Dirijente kooperativa sira husu atu fó formasaun no atu fasilita rekursu umanu, oinsá hadi’a rekursu umanu iha kooperativa kréditu sira ho nia membru. Nune’e, sira mós bele implementa kapitál finanseiru ne’ebé mak  Governu investe,” Elizário Ferreira hateten ba Agência TATOLI hafoin hala’o semináriu no reuniaun planeamentu nasional ho dirijente no membru kooperativa sira iha Fundasaun Hanai Malu, Bairru-Pité, Dili, kuarta ne’e.

Governante ne’e hatutan, formasaun ne’ebé dirijente kooperativa sira prefere atu apoia kooperativa kréditu sira bazea ba tarrefa servisu, haree hosi estrutura haat iha kooperativa ne’ebé kompotu hosi konsellu diretiva, prezidente, tezoreiru, sekretáriu no membru.

“Hanesan Sekretária sei hetan formasaun kona-ba administrasaun kooperativa. Prezidente sei hetan formasaun kona-ba atu lidera kooperativa ida hodi fó benefísiu ba kooperativa, nune’e mós asegura nia sustentabilidade, estabilidade finanseiru no ekonómiku kooperativa nian,” Governante ne’e hateten.

Alende ne’e, nia dehan, konsellu fiskál husi estrutura haat kooperativa nian sei tuir formasaun oinsá halo fiskalizasaun ne’ebé di’ak ba servisu kooperativa liuliu ba ezekutivu nian. Tuir nia, parte ezekutivu sira sei hetan formasaun bazea ba konsesimentu kooperativa ninian oinsá atu jere kooperativa tuir padraun kontabilidade kooperativa.

Kona-ba komite kréditu sira, nia hateten, sei hetan mós formasaun atu hetan kréditu ida-ne’ebé di’ak no viavél no bele iha devolvimentu ne’ebé di’ak. Komite Edukasaun hosi estrutura kooperativa kréditu mós sei hetan formasaun, normalmete ba matéria sira loro-loron no beibeik atu nune’e sira bele tranzmite ba fali membru kooperativa sira seluk atu edukadu nafatin, liuliu domina oinsá atu uza osan, buka osan no rai osan.

Iha fatin hanesan, Prezidente Kooperativa Kréditu Lakon Nakukun Mosu Naroman (LANAMONA), Domingas dos Santos, hateten enkotru ko’alia liu kona-ba oinsá halo politika di’ak ba dezenvolvimentu kooperativa ho nia sustentabilidade.

“Ida-ne’e vantajen bo’ot ida ba kooperativa tanba agora daudaun kooperativa hotu tuir valór kooperativa nian no tenke hahú ho edukasaun, kontrola ho edukasaun, no dezenvolve ho edukasaun,” Domigas dos Santos hateten.

Nia mós sujere, bainhira SECoop fó formasaun karik tenke iha nia kontinuidade to’o iha nia sutentabilidade.

Jornalista: Natalino Costa

Editór: Cancio Ximenes

HAKEREK NO HATÁN

Please enter your comment!
Please enter your name here