DILI, 09 dezembru 2020 (TATOLI)-Komisaun Anti-Korrupsaun (CAC), ohin, iha Dili, komemora loron internasionál ba anti-korrupsaun.
Timor-Leste hanesan nasaun ne’ebé retifika konvensaun internasionál anti-korrupsaun nian no hanesan mós membru Organizasaun Nasoins Unida (ONU) iha obrigasaun mútua hodi komemora loron anti-korrupsaun ne’e nu’udar esforsu ba iha luta kombate korrupsaun.
Serimónia ne’e hala’o iha salaun Lalini Lariguto, CNE (Comição Nacional das Eleições), ho tema ‘’Hasa’e koñesimentu ajente públiku kona-ba lei medida prevensaun no kombate korrupsaun’’.
Komisáriu CAC, Sergio Hornai, hateten komemorasaun ne’e importante tebes ho finalidade oinsá konsolida Estadu hotu-hotu iha mundu tomak ba iha luta hasoru korrupsaun.
“Tinan-tinan CAC sempre komemora loron espesiál ne’e hodi promove atividade sira iha nivel nasionál to’o sub-nasionál hanesan afirmasaun ba dezenvolvimentu institusionál oinsá atu hametin vizaun no misaun ba kombate kriminalidade korrupsaun,” Sergio Hornai hateten iha nia diskursu.
Iha komemorasaun ba tinan ne’e, Sekretáriu Jerál ONU, António Guterres hato’o nia mensajen rua ba nasaun membru hotu iha mundu, hanesan; dahuluk kona-ba ho velosidade dinámika saúde públiku ne’ebé lao iha mundu lori Estadu-sira hotu atu hakarak ka lakohi tenke buka esforsu halo medida-sira ba rekuperasaun iha saúde ninian ho rekursu hotu-hotu atu bele posibilita ekipamentu oinsá atu asegura ema nia direitu-sira liu-liu ba saúde públika ba ema nia moris.
Daruak, oinsá bele hasae integridade liu-liu Estadu parte sira atu halo ezekusaun orsamentu Estadu nian mezmu iha situasaun estraordináriu COVID-19 maibé Estadu tenke pondera tuir prosedimentu-sira.
“Mensajen Sekretáriu Jerál ONU nian ne’e bolu tulun ba Estadu rigór atu prudente husu nafatin asegura prosedimentu-sira atu labele kauza integridade Estadu nian liu-liu mosu infrasaun ba krime korrupsaun,” Sergio Hornai haktuir.
Nia hatutan, Estadu iha obrigasaun ba planu no programa ho orsamentu-sira hametin integridade iha nia ezekusaun-sira tanba osan-sira atu mai atu destina duni ba povu nia interese oinsá akizisaun ba medikamentu hodi hatán ba saúde públiku nian.
Komisaun CAC, Sergio Hornai, hateten, iha tinan kotuk tuir índise persesaun Timor-Leste presiza servisu koletivu hodi luta kontra korrupsaun iha Timor-Leste seidauk to’o iha nivel médiu ka klaran signifika TL sei iha entre 30, 39 ne’e signifika TL nia luta ba iha kombate kriminalidade presiza tau hanoin koletivu hodi bele hasae índise persesaun ba iha korrupsaun nian.
Tuir nia haree Timor-Leste presiza hametin lei-sira, dinamiza lei karik iha lakuna ka falta ruma, reforsa servisu instituisaun-sira ba iha kontrolu iha medida prevensaun no represivu ho sira seluk tan.
Nia fiar katak konseitu korrupsaun ne’e lori perigu ka ameasa ba Estadu direitu demokrátiku ba interese grupu ninian hodi afeta ba dezenvolvimentu nasaun nian, tanba ne’e presiza parte hotu hamutuk iha fileira ida iha loron mundiál anti-korrupsaun hodi luta kontra korrupsaun iha Timor-Leste.
Jornalista : Nelson de Sousa
Editór : Francisco Simões
