Arcebispu Metropolitana Dili, Don Virgílio do Carmo da Silva SDB, iha tersa (08/12), entrega medalla kondekorasaun ba Katekista hamutuk ema na’in 30.Imajen/Nelia Fernandes.

DILI, 08 dezembru 2020 (TATOLI)—Arcebispu Metropolitana Dili, Don Virgílio do Carmo da Silva SDB, iha tersa (08/12), entrega medalla kondekorasaun ba Katekista hamutuk ema na’in 30 tanba fó dedikasaun durante tinan barak iha parókia sira iha Dioseze Dili nian.

“Ohin iha ita-nia leet, iha Katekista lubuk ida ne’ebé simu kondekorasaun. Iha tinan kotuk iha Katekista na’in 30 mak simu ona no ohin iha mós katekista na’in 30 Dioseze hakarak atu rekoñese sira-nia servisu,” Don Virgílio do Carmo da Silva, hateten durante selebrasaun aniversáriu tinan 80 ejisténsia Dioseze Dili, iha Katedrál Dili.

Dioseze Dili planea ba futuru, sei kontinua fó medalla kondekorasaun ba Katekista sira seluk ne’ebé fó ona dedikasaun durante tinan naruk maibé seidauk hetan rekoñesimentu.

Medalla ne’ebé simu ona, Bispu rekomenda ba Katekista sira atu uza iha selebrasaun misa no atividade relijiozu sira seluk tanba ne’e hanesan identidade ida.

“Medalla ohin simu ne’e la’ós tara de’it bainhira ita mate, maibé tara bainhira ita-boot sira iha parókia ka iha loron bo’ot sira, iha ita-bo’ot sira-nia fatin, atu nune’e bele lori nafatin identidade,” Bibi atan Dioseze Dili ne’e hatutan.

Iha fatin hanesan Katekista, Vicente de Paulo husi Parókia São José Operáriu Remexio, Aileu agradese ba medalla ne’ebé maka nia simu ona husi Arcebispu Don Virgílio do Carmo da Silva SDB.

“Ba oin, sei servisu di’ak liutan, sei lori hau-nia sarani sira ba Maromak, ba Jesus Kristu ba Nain-Feto no hametin unidade sarani Katólika iha hau-nia estasaun, liliu iha hau-nia parókia no iha hau-nia família,”nia promete.

Nune’e mós Katekista Armanda de Araújo, husi Parókia Gleno Munisípiu Ermera, apresia ho kondekorasaun ne’e.

“Ha’u sente hau-nia aan katak bainbain ha’u servisu iha sarani sira-nia leet, ha’u servisu laiha folin, maibé haree ikus mai ha`u hamrik iha Bispo nia oin hetan kondekorasaun ba medalla ne’e, ha’u sente katak servisu ne’e iha folin duni,” katak nia.

Jornalista : Nelia Fernandes

Editór :Agapito dos Santos

HAKEREK NO HATÁN

Please enter your comment!
Please enter your name here