Jogu amigável entre ekipa faminina RAEOA no MAPKOMS. Imajen Tatoli/Xisto Freitas

DILI, 06 dezembru 2020 (TATOLI)–Jogu amigável entre ekipa feminina RAEOA no MAPKOMS, lori vitória ba ekipa RAEOA ho skor 5-4, iha ámbitu selebrasaun “Hapara Violénsia Hasoru Feto no Labarik, Agora”, iha kampu futsal, Bebora, Dili, domingu ne’e.

Iha jogu primeira parte entre ekipa feminina rua ne’e, hahú ho ritmu ne’ebé neineik no idak-idak hatudu mós ninia jogu ne’ebé bonita tebes.

Iha jogu ne’e, ekipa Rejiaun Administrativa Espesiál Oé-Cusse Ambeno (RAEOA) liuhusi jogadora Inacia Manca (13) konsege marka golu iha minutu 4. Aleinde ne’e, jogadora Jenivia Bano (3) iha minutu 6 marka tan golu ida ba guarda rede ekipa Ministériu asuntu Parlamentár no Komunikasaun Sosiál (MAPKOMS). Nune’e, skor provizória sai 2-0.

Maski nune’e, iha jogu primeira parte ekipa femenina RAEOA liuhusi guarda rede, Filomena Babo (20) tenke sofre golu rua husi jogadora MAPKOMS, Marcia Chaves (11), iha minutu 10 no 12. Tan ne’e, skor nakfilak sai 2-2, to’o jogu primeira parte termina.

Iha joga segunda parte, ekipa RAEOA konsege hatama golu iha minutu 17, liuhusi jogadora Jenivia Bano (3), iha-ne’ebé konsege muda tan skor sai 3-2.

Maibé, la kle’ur de’it responde kedas husi ekipa MAPKOMS ne’ebé mak serbisu maka’as entre jogadora sira liuliu Marcia Chaves (11) iha minutu 19 hatama golu ida, ho mós jogadora Madalena Soares (4) enxe tan golu ida iha minutu 21, nunee skor imediatamente muda an sai 4-3.

Ekipa RAEOA la nonook. Liuhusi jogadora Jenivia Bano (3) marka golu rua tutuir malu iha minutu 24 no 26. Ne’e duni, iha jogu amigável ne’e, lori vitória ba ekipa RAEOA ho skor 5-4.

Jornalista: Domingos Piedade Freitas

Jornalista: Xisto Freitas

HAKEREK NO HATÁN

Please enter your comment!
Please enter your name here