Imajen/Media GAACPR.

DILI, 05 dezembru 2020 (TATOLI)—Espoza Prezidente Repúblika, Cidalia Lopez Nobre Mouzinho Guterres, husu atu iha nível pre-eskolár bele iha espasu ba labarik sira atu halimar hodi aprende no sente seguru.

Cidalia Lopez Nobre Mouzinho Guterres, apela ba manorin sira atu tenke implementa programa zero toleransia ba violénsia iha eskola tanba labarik ne’ebé mak sofre hosi violénsia, nia prestasaun akadémiku menus kompara ho labarik sira ne’ebé nunka hetan violénsia fízika no verbal husi família.

Imajen/media GAACPR.

“Ha’u husu atu iha nível pre-eskolár bele iha espasu ba labarik sira atu halimar hodi aprende no sente seguru. Ba manorin sira, ha’u husu atu manorin sira implementa programa zero toleransia ba violénsia iha eskola. Tuir estudu organizasaun Plan International no UNICEF hatudu katak labarik ne’ebé mak sofre husi violénsia, nia prestasaun akadémiku menus kompara ho labarik sira ne’ebé nunka hetan violénsia fízika no verbal hosi família,” dehan Espoza PR, Cídalia Lopes Nobre Mouzinho Guterres iha serimónia Graduasaun ba estudante Ensinu Pre-Eskolár, Santa Teresinha do Menino Jesus, Bedois, Camea, Dili, sesta ne’e.

Espoza Prezidente Repúblika hatutan, aktu violentu fó impaktu makaas ba dezenvolvimentu fíziku no psikolójiku labarik nian. Tanba, nia dehan, família nu’udar nukleu dahuluk ba edukasaun oan sira-nian entaun inan-aman sira kria tenke ambiente saudavel ba kresimentu fíziku no psikolòjiku labarik sira-nian.

Tanba ne’e, inan ba nasaun ne’e apela apela ba Estadu atu fó atensaun liu ba formasaun atu hasa’e koñesimentu manorin sira no infraestrutura nesesáriu atu hetan edukasaun ho kualidade. Nia fó enfaze ba edukasaun ho kualidade ne’ebé ekuititativu no inkluzivu hodi promove oportunidade ba aprendizajen durante moris tomak ba ema hotu-hotu.

Iha biban ne’e, Espoza Prezidente Repúblika kongratula no agradese inisiativa Diretór Eskola Pe. Alberty Franco Morato, manorin no família estudante sira-nian ba esforsu tomak hodi kria edifísiu pre-eskolár foun.

Nia dehan, Estadu presiza halo esforsu atu investe ba setór edukasaun prinsipalmente ba labarik ho idade 3-5 nu’udar preparasaun ba ensinu báziku obrigatóriu hodi asegura Timor-Leste iha rekursu umanus adekuadu ba dezenvolvimentu País.

Komunikadu Imprensa

HAKEREK NO HATÁN

Please enter your comment!
Please enter your name here