Leorema-oan na’in-22 hosi Suku Leorema, Postu Administrativu Bazartete, Munisipiu Liquiça deside halibur malu ho voluntáriu harii kooperativa kreditu. Imajen TATOLI/Natalino Costa.

LIQUIÇÁ, 05 dezembru 2020 (TATOLI)—Komunidade ka Leorema-oan na’in-22 hosi Suku Leorema, Postu Administrativu Bazartete, Munisipiu Liquiçá deside halibur malu ho voluntáriu harii kooperativa  kréditu iha sira-nia suku rasik.

Prezidente Kooperativa Credito União de Estrela, Emanuel Lobato, hateten objetivu hosi harii kooperativa atu eduka komunidade oinsá atu poupa osan hodi iha osan rasik, rai osan no empresta osan, nune’e bele fó benefísiu ba iha komunidade hodi hasa’e sira-nia ekonómia liuhusi uniaun kréditu kooperativa.

Tanba ne’e, nia hatutan, nu’udar Leorema-oan, nia parte hato’o agradese ba Governu Timor-Leste liuliu Sekretaria Estadu Kooperativa (SECoop, sigla Portugés) tanba bele aseita ona Leorema nia pedidu hodi harii kooperativa ida.

“Ami hakarak agradese ba Governu Timor-Leste, liuhosi Sekretária Estadu Kooperativa ne’ebé aseita ami Leorema-oan tomak nian pedidu hodi fasilita ami,  fó sensibilizasaun no  formasaun oinsá hakle’an ami-nia koñesementu iha área kooperativa. Nune’e,  ohin loron, ita bele harii kooperativa iha Suku Leorema rasik  ho naran Credito União de Estrela,” Prezidente Kooperativa Credito União de Estrela,  Emanuel Lobato, hato’o nia intervensaun hafoin simu pose hodi lidera Coperativa Credito União de Estrela iha Suku Leorema, Postu Administrativu Bazartete, Munisípiu Liquiça, sábadu ne’e.

Nia dehan, inisiativa Leorema-oan harii kooperativa ne’e atu  fó hanoin  hikas ba Leorema-oan sira  jestu  no asaun ne’ebé Prezidente Nicolau dos Reis Lobato hanesan ema Leorema-oan hamutuk ho nia kolega Vicente  Reis Sahe, nu’udar fudandór kooperativa iha Timor-Leste  iha tempu difisil 1975, hodi konsege prodús nesesidade sira hodi apoia luta ukun rasik aan.

Tanba ne’e, nia dehan, atu hametin ezisténsia kooperativa ne’ebé Leorema-oan rasik harii ne’e, husu hotu-hotu tenke iha responsablidade tanba ezisténsia kooperativa ne’e la’ós oportunidade maibé responsablidade.

“Hanesan Prezidente eleitu, agradese ba konfiasa ne’ebé atribui ona ha’u maibé husu ida-idak iha responsablidade atu lori Cooperativa Credito União de Estrela ba oin. Ha’u agrade tebes ba Xefe Suku ne’ebé fó ninia dedikasaun hodi kotribui harii kooperartiva iha suku Leorema ida ne’e. Signifika, mai ho hanoin ida katak proukupa duni ba ema-nia moris. Tanba,  kooperativa ne’e la’ós ba ema ida de’it mak hetan benefísiu maibé ida-ne’e sei benefisia ema barak liuhosi eleva sira-nia ekonómia,” nia hateten.

Iha fatin hanesan, Konselleiru Ba Grupu Cooperativa Credito União de Estrela, Luis Lobato hateten, nia parte dezafia grupu kooperativa refere atu servisu hamutuk liuhosi koordenasaun no komunikasaun nafatin hodi fó lori kooperativa la’o ba oin nafatin.

“Ha’u hanoin harii kooperativa la fasil. Bainhira ita laiha prinsípiu no laiha kolaborasaun servisu  ne’ebé di’ak, ita-boot sira haree kooperativa barak mak mate tanba laiha kolaborasaun di’ak. Tanba ne’e, atu kooperativa ne’e la’o ba oin tenke iha responsabilidade komitementu kolaborsasaun di’ak no transparánsia,” Luis Lobato fó hanoin.

Leorema-oan na’in-22 hosi Suku Leorema, Postu Administrativu Bazartete, Munisipiu Liquiça deside halibur malu ho voluntáriu harii kooperativa kreditu. Imajen TATOLI/Natalino Costa.

Entretantu, Xefe Suku Leorema, Sandra Araujo Lobato hateten, nia parte kontente tanba suku ne’e primeira vez iha kooperativa. Nia dehan, hanesan autoridade lokál no membru kooperativa suku ne’e nian, nia sei buka kolabora hodi lori kooperativa ne’e ba oin sai di’ak liután.

Alende ida-ne’e, Sekretariu Estadu Kooperativa, Elizario Fereira, husu ba membru kooperativa Credito União de Estrela hodi  servisu, nune’e bele atinji objetivu.

“Ha’u hakarak husu ba sira, atu servisu lori kooperativa ne’e ba oin, atu ema hotu bele sai benfisiáriu, Governu ba oin kontinua apoia grupu kooperativa sira. Tanba ne’e mak  husu atu kontinua servisu makaas hodi  lori kooperativa kreditu ne’e besik liu ba komunidade iha Suku Leorema no sira  sai benefisiáriu ba kooperativa ne’e rasik,” Governante ne’e hateten.

Kooperativa Credito União de Estrela daudaun ne’e iha membru nain-22 ne’ebé inísia no funda hosi Leorema-oan rasik no sira daudaun ne’e iha kapital inísiu ba harii kooperativa ne’e iha $585.

Antes sai  hanesan kooperativa Cooperativa Credito União de Estrela hetan treinamentu hosi ekipa SECoop  durante loron haat nia laran no grupu ne’e formaliza no hetan pose hosi Sekretariu  Estadu Kooperativa (SECoop) Elizario Fereira. Iha seremonia tomada de pose ne’e rasik hetan partisipasaun hosi  Direjente SECoop, Konsilleiru Credito União de Estrela, autoridade postu lokál suku Leorema no komunidade sira.

Jornalista: Natalino Costa

Editór: Cancio Ximenes 

HAKEREK NO HATÁN

Please enter your comment!
Please enter your name here