DILI, 05 dezembru 2020 (TATOLI)–Ekipa zigante Lalenok United FC kontinua hametin nia “glória” hodi ultrapasa ba finál Tasa 12 Novembru hafoin halakon nia adversáriu Boavista FC Timor liuhosi xuta penalidade, iha Estádio Municipal de Dili, sábadu ne’e.
Hosi vitória ne’ebé Lalenok hetan, lori ekipa ne’e iha direitu absolutamente hakat ba finál, iha-ne’ebé hodi hein ekipa AD DLB Laulara no DIT FC ne’ebé sei joga iha 06 dezembru.
Hanesan babain, jogu komesa hala’o ekipa rua lansa kedas kontra ho atake ba malu hodi buka hatama golu nune’e bele fó vitória ba ekipa.
Lalenok halo presaun maka’as iha primeira parte hodi halo Boavista book an araska uitoan. Nune’e, iha minutu 24, jogadór Lalenok Paulo Gally lansa ona golu dahuluk liuhusi bola kantu hodi hatuur score ba 1-0.
Jogu komesa manas liután. Boavista la husik leet de’it Lalenok halo presaun. Sira mós halo presaun maka’as nune’e presaun hirak-ne’e la sai de’it hanesan presaun maibé hatudu duni rezultadu. Nune’e, iha minutu 43 kapitaun Boavista Nataniel Reis responde kedas golu ida hodi lori rezultadu ba 1-1 to’o minutu primeira parte termina laiha tan golu ruma mak akontese.
Hakur ba segunda parte, ekipa rua nafatin blokeia malu liuhosi tékniku ne’ebé iha maibé la rezulta golu ruma to’o árbitru huu apitu naruk termina jogu iha-ne’ebé rezultadu hela ho impata 1-1.
Hosi rezutadu ne’e, obrigadu lori ekipa rua tenke hakat ba xuta penanidade hodi buka sorte sé loos mak atu manán.
Hosi xutu penalidade ne’e, sorte boot monu ba Lalenok tanba nia jogadór konsege xuta ho susesu. Enkuantu, Boavista nia jogadór tolu falla xutu hodi fó oportunidade totál ba Lalenok United.
Golu Lalenok nian ne’ebé rezulta hosi xutu penalidade ne’e rekolla hosi jogadór Rofino Gama (11), Alan Melo (8) no Paulo Gally (21). Entretantu, golu Boavista xutu hosi Edit Savio (9).
Jornalista: Hortencio Sanchez
Editór: Xisto Freitas
