Deputadu PD, Adriano do Nascimento. Foto TATOLI

DILI, 05 dezembru 2020 (TATOLI)—Deputadu Bankada Partidu Demokrátiku (PD), Adriano do Nascimento, rekomenda ba VIII Governu Konstitusionál atu hamosu diálogu nasionál nune’e sosiedade hotu-hotu diskute sustentabilidade fundu minarai.

Deputadu Bankada Partidu Demokrátiku (PD), Adriano do Nascimento, halo predisaun katak tempu ida laiha rekursu finanseira hodi sustenta povu no nasaun nia moris.

Nia sujere ba Primeiru-Ministru, karik bele iha tuur konseitu ida katak Timor-Leste nia fundu petrolífetu nia sustentabilidade ne’e iha kestaun.

“Ha’u husu Primeiru-Ministru bele hamutuk ho Prezidente Repúblika no Prezidente Parlamentu Nasionál, buka ona tempu para halo ona diálogu nasionál ida hodi ko’alia kona-ba sustentabilidade fundu petrolíferu no mos solusaun fonte reseita ba estadu nian. Ha’u preokupa tebes ita la hanoin agora, sá tán ita satán malu, hatún-malu, haketak-malu,” Deputadu Adriano do Nascimento hato’o ideia ne’e liuhosi debate proposta-lei OJE 2021, iha faze espesialidade loron daruak, iha plenária Parlamentu Nasionál, sábadu ne’e.

Nia husu ba xefe Governu atu konvense líder istóriku sira hodi buka solusaun ba sustentabilidade fundu minarai hodi sustenta povu no nasaun nian.

Eis Prezidénsia Konsellu Ministru tempu VII Governu Konstitusionál hato’o opiniaun ne’e ho razaun fundamentál tolu hanesan fonte reseita petrolifera Bayu Undan menus daudaun, atu halo dezenvolvimentu ba Greater Sunrise mós seidauk iha serteza ne’ebé seidauk fó esperansa boot no problema reseita doméstika hakdasak hela.

Nune’e mós pandemia globál surtu COVID-19 ne’ebé nasaun tomak iha mundu enfrenta.

“Ha’u atu husu ita-boot nia polítika ka Governu ida-ne’e ninia polítika, sá polítika ekonómika mak timor-leste tenke hatuur durante VIII Governu nia mandatu ne’e, para atu-bele fó solusaun alternativa no problema tolu ne’ebé ha’u mensiona. Tanba, se ita la hanoin agora, derrepente ita foti hotu fundu petrolífera, nasaun ne’e atu ba ne’ebé,” deputadu PD ne’e fó hanoin.

Sustentabilidade Fiskál 

Bazea ba Livru (Panorama Orsamentál) previstu despeza governu sei depende maka’as ba fundu minarai. Governu nia politíka fiskál maka Politíka Fiskál Antesipada (front‐loading fiscal policy), katak halo orsamentu estadu boot iha períodu tempu badak liuhusi finansiamentu esesu levantamentu hodi finánsia dezenvolvimentu kapitál umanu no infrastrutura bazíka atu fasilita no enkoraja investimentu setór privadu no diversifika ekonomia.

Iha livru panorama orsamentál ne’e hateten, kresimentu ekonómiku ne’ebe forte no sustentável ho investimentu setór privadu sei hamosu reseita doméstika barak no hamenus levantamentu hosi fundu minarai iha futuru.

Governu liuhosi Ministériu Finansa halo análize sustentabilidade fiskál ba tetu orsamentu kada tinan. Liuhosi análize ida-ne’e bele hatene sustentabilidade fiskál ba tempu naruk, partikularmente sustentabilidade fundu minarai.

“Anáize sustentabilidade fiskál foku ba impaktu despeza kapitál ba PIB no koleksaun reseita doméstika iha tempu naruk no nia implikasaun ba balansu fundu minarai. Bazeia ba senáriu despeza ne’ebé aprezenta iha tabela 1 ho kategoria orsamentu hotu‐hotu sei sa’e 4% kada tinan, esepsaun ba kapitál dezenvolvimentu ne’ebe nia kresimentu bazeia ba estimasaun hosi fundu infraestrutura ba períodu 2021-2025, kresimentu ekonómiku no inflasaun. Ho senáriu ida-ne’e prevee katak fundu minarai sei hotu iha 2033 ka hotu iha tinan 13 nia laran,” refere livru panorama orsamentál.

Reseita Fundu Minarai 

Iha livru panorama orsamentál ne’e esplika, fundu  minarai kontinua nu’udar fonte finansiamentu prinsipál ba OJE. Levantamentu fundu minarai halo liuhusi mekanismu (Rendimentu Sustentável Estimadu (RSE) no esesu levantamentu ne’ebe tenke utiliza ba interese Timor-Leste nian iha tempu naruk.

Kalkulasaun RSE halo bazeia ba projesaun valór fundu minarai iha inisiu tinan finanseira no valór prezente hosi reseita minarai ne’ebé atu hetan iha futuru. Presupostu sira-ne’ebé uza ba kalkulasaun RSE ba OJE 2021 kuaze hanesan ho OJE 2020 nian, maske retornu investimentu no reseita petrelífera iha 2020 iha mudansa tanba hetan aumentu.

Nunee, prevee katak sei iha aumentu ba balansu fundu minarai no RSE ba 2021 sei sa’e ba millaun $547.9 ka iha aumentu millaun $12.3. Levantamentu fundu minarai ba OJE 2021 hamutuk biliaun $1,377, reprezenta 7.6% rikusoin petrolíferu no esesu levantamentu hamutuk millaun $829.7.

Purtantu to’o iha fulan-setembru, balansu fundu minarai hamutuk biliaun $18,469, retornu investimentu hamutuk millaun $906.5 (5.2%) no reseita petrolíferu hamutuk millaun $290.4 . Prevee katak balansu fundu minarai to’o tinan 2020 nia rohan hamutuk  biliaun $18,065.7.

Maibé balansu ida-ne’e bele muda depende ba dezempeñu investimentu iha merkadu finanseiru no levantamentu hodi finánsia orsamentu estadu iha kuarter ikus tinan 2020 nian.

“Valór fundu minarai prevee sei kontinua tún iha futuru tanba reseita minarai sei kiik kompara ho tinan anteriór nu’udar konsekuénsia hosi produsaun iha kampu Bayu‐Undan ne’ebé tún no retornu investimentu dala ruma la sufisiente ka kiik kompara ho nível levantamentu,” refere livru panorama orsamentál, ne’ebé asina hosi Ministra Finansa Ein-Ezersísiu, Sara Lobo Brites.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here