Jogadór DIT FC, selebra vitória bainhira hatama golu ba guarda rede Karketu Dili FC iha Tasa 12 Novembru, iha Estádiu Munisipál Dili, Tersa (18/11). Imajen Tatoli/António Gonçalves

DILI, 04 dezembru 2020 (TATOLI) – Treinadór DIT FC, Mial Armand hateten, jogadór ne’ebé mak hanesan xave iha AD SLB Laulara hodi fó vitória ba SLB mak Jhon Frith (6).

Jogadór AD.SLB festeja sira-nia vitória iha kampu laran. Imajen/Mídia FFTL

Iha semi finál tasa  12 Novembru, epoka ne’e, DIT FC sei kontra AD. SLB tanba ne’e, Mial Armand orienta ba nia jogadór-sira  atu matan moris ho Jhon Frith hodi hamate nia jogu.

“SLB nia jogu ha’u haree ona, sira-nia xave importante ne’e mak iha liña klaran. Sira-nia liña klaran ne’e mak halo moris jogu hodi distribui bola ba avansadu-sira. Entaun jogadór klaran nian mak númeru kamizola 6 ne’e, ha’u tau atensaun maka’as ba nia tanba ita haree nia jogu ne’e moris hosi oin ba klaran no ba hotu kotuk,”  hateten treinadór DIT FC, Mial Armand, ohin, ba jornalista sira iha Estádiu Munisipál Dili.

Nia konsidera, Jhon Frith hanesan mós “fuan” hodi fó moris ba liña hotu-hotu iha kampu-laran.

Iha parte seluk nia relata, jogadór DIT menus liu iha jogu semi finál ne’e tanba jogadór balun daudauk ne’e hetan kartaun kinur nune’e sei buka meiu oinsá atu monta jogadór-sira liña ba liña ho di’ak.

Maski SLB ekipa ida ne’ebé bele dehan forte iha Timor-Leste maibé hanesan treinadór nia otimista katak sei manan iha jogu ne’e.

Jornalista   : Hortencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here