Mariano Assanami Sabino. Imajen Tatoli/António Gonçalves.

DILI, 04 dezembru 2020 (TATOLI)- Membru Parlamentu Nasionál (PN) hosi Bankada Partidu Demokrátiku (PD), Mariano “Assanami” Sabino, ohin, propoin atu halo alterasaun millaun $40 hosi kategoria transferénsia iha orsamentu Ministériu Obras Públika (MOP) hodi kapitaliza ba Banku Nasionál Komérsiu Timor-Leste (BNCTL, sigla portugés) atu bele fasilita kréditu ba timoroan.

Dotasaun inisiál hosi kategoria despeza ba boa governasaun no institusionál iha MOP ne’ebé propoin iha OJE 2021 millaun $194,490, nune’e propoin altera millaun $40 ne’ebé totál hela de’it millaun $154,490

Iha OJE 2021, Governu aloka $50,000 atu kapitaliza BNCTL no $10,000 ba Banku Sentrál Timor-Leste (BCTL) hodi fasilita empréstimu ba Timoroan, liuliu empreza-sira atu atividade ekonomia la’o di’ak.

Proposta alterasaun ne’e, tuir prezidente PD ne’e katak bazeia polítika Governu katak presiza fó kondisaun atu estimula vontade emprezáriu lokál-sira atu sira bele moris no bele kompete iha vida negósiu nian.

“Ho razaun ne’e ami propoin millaun $40 hosi orsamentu hosi kategoria transferénsia públiku iha Ministériu Obras Públiku (MOP) nian atu bele aumenta kapitalizasaun BNCTL sai  millaun $90 hodi fasilita ita nia emprezáriu-sira hodi bele hala’o sira nia vida emprezáriu ho di’ak, dignu no kompetitivu,” tenik Assanami Sabino iha debate loron dahuluk OJE 2021 iha faze espesialidade iha sala plenáriu Parlamentu Nasionál.

Primeiru-Ministru, Taur Matan Ruak. Imajen Tatoli/Egas Cristovão

Hatán ba kestaun ne’e, Primeiru-Ministru, Taur Matan Ruak, hateten VIII Governu Konstitusionál kompromete kapitaliza BNCTL no BCTL ho millaun $50 iha OJE 2021.

Alokasaun ne’e, Taur hateten,  atu fasilita  empréstimu  ba Timoroan no setór privadu  atu estimula ekonomia, hamenus dezempregu no harii dalan ne’ebé di’ak liubá kreximentu no reziliénsia.

Nia hatutan, lójika polítika fó empréstimu ba ema no empreza-sira atu evita indivíduu no empreza-sira labele monu ba falénsia no estimula ema no empreza-sira atu foti empréstimu hodi sustenta sira-nia kompras, traballadór no investimentu, ne’ebé sei aumenta prokura kontrasaun ekonómika.

“Ami-nia hanoin, importante atu kapitaliza BNCTL ho millaun $40 no BCTL ho millaun $10,” Xefe Governu afirma.

Ho polítika kapitalizasaun ne’e, eis Prezidente Repúblika ne’e fiar katak bele alkansa produtividade no kriasaun empregu ho polítika-sira seluk ne’ebé apoia dezenvolvimentu setór produtivu sira-nian.

Jornalista   : Florencio Miranda Ximenes

Editór        : Francisco Simões

HAKEREK NO HATÁN

Please enter your comment!
Please enter your name here