Sekretáriu Estadu Formasaun Profisionál no Empregu, Alarico do Rosário Imajen TATOLI/Egas Cristovão

DILI, 03 dezembru 2020 (TATOLI)Sekretáriu Estadu Formasaun Profisionál no Empregu (SEFOPE), Alarico do Rosario, klarifika kona-ba kandidatu traballadór na’in-haat hosi 162, ne’ebé kansela viajen bá Austrália iha kuarta (02/11) tanba kestaun dokumentu.

Tuir Sekretáriu Estadu, SEFOPE antes ne’e prepara ona lista traballadór na’in-162 maibé bainhira atu aranka traballadór na’in-haat kansela viajen tanba impedimentu balun, teste saúde no sistema la deteta naran.

“Rezultadu teste SEFOPE la hatene, maibé entre traballadór ho Australian Department of Home Affairs mak hatene, sira manda rezultadu ba traballadór ida-idak. Sira manda rezultadu hosi na’in-162 maluk balun lakon iha teste saúde, tanba ne’e ami la halo intervensaun nein desizaun tanba buat hotu Austrália mak halo,” Sekretáriu Estadu Alarico dehan iha Caicoli, kinta ne’e.

Notísia Relevante: Traballadór haat kansela viajen bá Austrália tanba falla dokumentu komprovativu

Traballadór timor-oan haat ne’ebé kansela viajen kompostu hosi mane tolu no feto ida, ne’ebé traballadór feto ida kansela viajen tanba iha problema entre família.

“Nia kaben la hatan bá tanba traballadór ne’e la’ós foun, nia bá bebeik ona. Agora tanba atende família entaun ida-ne’e kansela,” nia akresenta.

Governante ne’e dehan, parte SEFOPE hakarak ajuda trata dokumentu maibé iha parte balun maka la permite atu halo intervensaun.

“Ita hakarak ema na’in-162 ba hotu, maibé tanba urjente maka maluk balun labele aranka,  bainhira ita obriga to’o iha Austrália mós sira tenke filafali tanba teste saúde,” nia hatutan.

Sekretáriu Estadu haktuir, tanba na’in-tolu la konsege liu teste saúde maibé tenta sa’e aviaun, to’o ikus naran la tama sistema.

“Ami-nia ekipa halo kedan negosiasaun momentu ne’ebá  maibé hosi aviaun Qantas nia ekipa ne’ebé responsável la permite,” nia hatutan.

Biban ne’e, membru ezzekutivu ne’e husu ba kandidatu traballadór ne’ebé la konsege halo viajen atu labele pesimista tanba loron ruma sei ba filafali.

“Horseik kedan ha’u halo enkontru ho sira hodi esplika kestaun ne’e. Kona-ba prosesu teste saúde la’ós halo iha Timór maibé iha Austrália,” nia esplika.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here