Aprezentasaun IPG kona-ba risku jeolojia ba autoridade munisípiu Ainaro, iha salaun Administrasaun, kinta (03/12). Imajen TATOLI/Antónia Gusmão

AINARO, 03 dezembru 2020 (TATOLI)-Tuir rezultadu peskiza preliminár ne’ebé mak hala’o hosi peskizadór Institutu Petróleu no Jeologia (IPG, sigla portugés), identifika katak munisípiu Ainaro risku ba rai-halai.

Peskiza realiza durante fulan-rua, hahú hosi fulan-outubru to’o dezembru 2020 iha munisípiu Ainaro.

Liuhosi aprezentasaun, Asistente Peskizadora área risku rai-halai IPG, Joaquina Imaculada Mendes, fó sai kona-ba risku dizaste naturál.

“Kona-ba risku rai-halai iha munisípiu Ainaro, akontese tanba movimentasaun masa ou fatuk ne’ebé iha área a’as muda-an mai área badak, maibé iha ne’e iha tipu oioin, tipu ne’ebé ami utiliza maka monu, sulin, no seluk tan,” Asistente Peskizadora ne’e hateten liuhosi aprezentasaun rezultadu peskiza iha salaun administrasaun munisípiu Ainaro, kinta ne’e.

Aleinde ne’e, rai-halai tanba parte balun fó dalan ba rai atu muda-an, maibé IPG fahe informasaun kona-ba kauza naturál.

“Hanesan topografia katak, ita-nia rai ne’e la’ós tetuk de’it ou foho de’it, maibé rua ne’e iha hotu no área tasi ibun iha foho natón no a’as. Iha área topografia a’as afeta ba rai halai no mós kondisaun jeomorfolojia hanesan rai-lolon,” nia esplika.

Tuir nia, Ainaro sempre udan fó impaktu ba rai-halai inklui kauza sosiál hanesan komunidade sunu rai arbiru, tesi-ai, no halo uma arbiru iha área ne’ebé potensialidade risku rai-halai.

Nia mós fó hanoin katak Timor-Leste konsiste ho kondisaun jeolojia kompleksu tebes, tanba ne’e bele hamosu risku rai-halai, inundasaun, risku kosteira no risku seluk tán.

“Risku inundasaun ou risku área kosteira no risku rai halai, hanesan parte ida hosi risku jeolójiku ne’ebé barak liu fó ameasa ba populasaun sira-nia hela fatin no plantasaun, bazeia ba analiza Timor-Leste tama iha zona ida ne’ebé ameasa maka’as tebes ba risku jeolójiku,” Joaquina Imaculada hatutan.

Objetivu hosi aprezentasaun atu hala’o estudu formasaun fatuk ezistente iha munisípiu Ainaro hanesan fatuk kalkariu hosi formasaun  Aituto, Maubisse, no Kablaki, fatuk Arenito (rai-henek) husi Wailuli no Babulu, Gravel hosi formasaun Ainaro, Arjila (rai manu-teen) hosi formasaun Bobonaro, Fatuk ignea (vulkaun) hosi formasaun Lolotoe.

Nia mós nota katak, udan been kada tinan iha munisípiu Ainaro, ho intensidade kiik liu akontese iha agostu ho nia média kuaze 27 mm, maibé maioria udan akontese iha dezembru ho nia média kuaze 421 mm.

Morfolojia munisípiu Ainaro mak topografia tetuk loos no natón, hanesan área ne’ebé mak tetuk no maioria iha área kosteira ne’ebé lokaliza iha parte súl Ainaro.

Área estudu iha munisípiu Ainaro ho totál populasaun 66.397 (tinan 2015) no área nia luan 824,5 km2, munisípiu Ainaro kompostu hosi postu haat  hanesan Ainaro, Hato-udo, Hato-builico no Maubisse, munisípiu Ainaro iha totál suku 21 no totál aldeia 131.

Fronteira Ainaro husi parte norte, munisípiu Ermera no Aileu parte Súl, Tasi Timór, parte leste munisípiu Manatuto no Manufahi, no parte Oeste ho munisípiu Bobonaro no Covalima.

Asistente Peskizadora dehan, solusaun no mitigasaun mak liuhosi mapa suscetibilidade rai-halai, bele sai ona baze atu kria planu konstrusaun báziku ruma atu ‘prevene di’ak liu do que kura’ no tenki uza área jeolojia no enjiñaria jeolojia sai hanesan baze fatór importante ida atu harii konstrusaun ruma.

Enkuantu, estudu preliminária ne’e konklui katak munisípiu Ainaro, tama iha risku jeolójiku ne’ebé moderadu to’o a’as, bazeia ba ninia topográfiku no kondisaun Jeolojia ne’ebé eziste.

Estudu detallu, mapamentu no relatóriu finál ne’ebé maka IPG sei prodús kona-ba rai-halai sei fahe ba autoridade munisípiu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here